Balaly otbasylardy qoldaýǵa bıyl 974 mlrd teńge bólindi
ASTANA. KAZINFORM – Qazaqstanda balaly otbasylardy áleýmettik qoldaý kólemi ulǵaıyp keledi. Bıyl bul maqsatqa 974 mlrd teńge qarastyrylǵan, bul ótken jylmen salystyrǵanda 19,1%-ǵa kóp.
Balalardy qorǵaý jáne otbasylardy qoldaý jónindegi memlekettik saıasat aıasynda áleýmettik tólemder júıesi balanyń dúnıege kelýinen bastap kámeletke tolǵanǵa deıingi kezeńdi qamtıdy.
– Qarajat bala týýǵa baılanysty birjolǵy járdemaqylardy, bala kútimi boıynsha tólemderdi, kópbalaly otbasylar men múgedektigi bar balalardy tárbıelep otyrǵan otbasylardy qoldaýǵa baǵyttalady, – delingen Úkimettiń habarlamasynda.
Memleket barlyq áleýmettik járdemaqylardy jyl saıyn ındekstep otyrady. Máselen, 2026 jyly tórtinshi jáne odan keıingi balalardyń dúnıege kelýine baılanysty tólenetin birjolǵy járdemaqy kólemi 272 myń teńgeden asty.
Kópbalaly analardy qoldaý sharalary da jalǵasýda.
– «Altyn alqa» jáne «Kúmis alqa» ıegerlerin qosa alǵanda, kópbalaly analardyń mártebesin nyǵaıtýǵa baǵyttalǵan arnaıy qoldaý tetikteri qarastyrylǵan, – dep atap ótildi.
Sonymen qatar ata-anasynyń qamqorlyǵynsyz qalǵan balalardy qoldaý júıesi de jańǵyrtylyp jatyr. Osy baǵyttaǵy mańyzdy jańashyldyqtardyń biri – kásibı qabyldaýshy otbasy ınstıtýtynyń engizilýi. Bul júıe ómirlik qıyn jaǵdaıǵa tap bolǵan balalardyń otbasylyq ortada tárbıelenýine múmkindik beredi.
– Úmitkerler mindetti túrde psıhologııalyq daıarlyqtan jáne arnaıy oqytýdan ótedi. Balalardy kútip-baǵý shyǵyndary men qabyldaýshy ata-analardyń eńbekaqysy bıýdjet esebinen tólenedi, – delingen málimette.
Balalar úıleriniń tárbıelenýshilerin qoldaý tetikteri de keńeıtildi. 2025 jyldan bastap tálimgerlerdi mindetti sertıfıkattaý engizildi.
Turǵyn úı máselesinde de ózgerister bar. Endi Astana men respýblıkalyq mańyzy bar qalalarda jetim balalardy turǵyn úı kezegine qoıý úshin úsh jyldyq turaqty tirkeý talaby alynyp tastaldy. Sondaı-aq turǵylyqty jeri ózgergen jaǵdaıda kezektegi bastapqy tirkelý kúni saqtalady.
Memleket tarapynan jeńildetilgen ıpoteka, jaldaý aqysyn sýbsıdııalaý jáne «Meıirim» respýblıkalyq aktsııasy aıasyndaǵy ataýly qoldaý sharalary da qarastyrylǵan.
– Áleýmettik tólemder men qoldaý sharalaryn kezeń-kezeńimen keńeıtý otbasylardyń ál-aýqatyn jaqsartýǵa, ata-analardyń júktemesin azaıtýǵa jáne balalardy tárbıeleýge qolaıly jaǵdaı jasaýǵa múmkindik beredi, – delingen habarlamada.
Aıta keteıik, Qazaqstanda 6,9 mıllıonnan astam balanyń quqyǵyn qorǵaýǵa 1,3 trln teńge bólindi.
