Balalaryna alıment tólemegen elordalyq qamaýǵa alyndy

Nur-Sultan qalalyq sotynyń aqparatyna sáıkes, 2015 jyly azamat B.-nyń aı saıynǵy jalaqysynyń úshten bir bóligin kámeletke tolmaǵan balalaryna berý týraly sot úkimi shyqqan. Alaıda, jaýapsyz áke sot sheshimin oryndamaǵan. Osylaısha, 2019 jyldyń 3 qazanyna deıin alıment boıynsha qaryzy 3 mln teńgeden asyp jyǵylǵan.

«Sot otyrysynda B. óz kinásyn moıyndady. Nur-Sultan qalalyq mamandandyrylǵan aýdanaralyq ákimshilik sotynyń qaýlysymen azamat B. Ákimshilik quqyqbuzýshylyq týraly kodekstiń 669-baby 1-tarmaǵyna (Sot úkimin, sot sheshimin nemese ózge de sot aktileri men oryndaýǵa jatatyn qujatty oryndamaý) sáıkes ákimshilik jaýapkershilikke tartylyp, 3 táýlikke qamaýǵa alyndy», - dedi qalalyq sottan.

Qaýly zańdy kúshine engen joq.

Eske salsaq, Ádilet mınıstri Marat Beketaev alıment tóleýshilerge arnalǵan kómek qoryn qurý máselesin kótergen bolatyn.

«Qordyń tujyrymy shet memleketterdiń tájirıbesine negizdelip otyr. Álem elderiniń tájirıbelerin tereń taldadyq. Máselen, Fınlıandııada ómirdiń qıyn kezeńine tap bolǵan (mysaly, aýyryp qalǵan nemese jumystan shyǵyp qalǵan) alıment tóleýshilerge kómektesetin qor bar. Ol elde boryshkerler qordan aqsha alyp, bereshegin ótep, jaǵdaıy jaqsarǵannan keıin qaıtadan qordy toltyrýǵa mindettelgen», - degen bolatyn Marat Beketaev Ádilet mınıstrliginde ótken dóńgelek ústelden keıin tilshilerdiń suraǵyna jaýap bere otyryp.

Osy dóńgelek ústelde atap ótilgendeı, bıylǵy jyldyń alty aıy boıynsha alıment óndirý salasynda sot oryndaýshylardyń (memlekettik jáne jeke) qolynda 230 myńǵa jýyq is bar.