Balalaryn túnde erkimen jibergen 372 ata-ana jaýapqa tartyldy
ALMATY. QazAqparat - Almatydaǵy jergilikti ıývenaldy polıtsııa tún ishinde qaraýsyz júrgen jasóspirimder men bala eńbegin paıdalaný faktilerin anyqtaý maqsatynda reıd ótkizdi, dep habarlaıdy «QazAqparat» HAA tilshisi Almaty ІІD baspasóz qyzmetine silteme jasap.
Іs-shara barysynda qoǵamdyq uıymdardyń músheleri men BAQ ókilderi 6 topqa bólinip, polıtsııa qyzmetkerlerimen birge qaladaǵy oıyn saýyq jáne qoǵamdyq oryndardy aralady.
«Reıd barysynda 414 jasóspirim jetkizildi, sonyń ishinde 392 bala ákimshilik quqyqbuzýshylyq jasaǵan, 22-si - qaraýsyz júrgender. Beıimdeý ortalyǵyna 19 bala jetkizildi. Balalaryn túnde qaraýsyz jibergen 372 ata-ana ákimshilik jaýapqa tartyldy», - deıdi polıtsııa polkovnıgi Leıla Álipbaeva.
Onyń aıtýynsha, oıyn-saýyq ortalyqtaryna kámeletke tolmaǵan jasóspirimderdi kirgizgeni úshin 15 jaýapty tulǵaǵa qatysty materıaldar jasóspirimder isi boıynsha aýdanaralyq sotqa jiberildi.
Sonymen qatar, balalarǵa alkogol jáne temeki ónimderin satqan 8 saýda núktesi anyqtaldy.
