Balalaryn tárbıeleý mindetterin oryndalmaǵany úshin 310 tulǵa jaýapkershilikke tartyldy - Astana
ASTANA. 22 qarasha. QazAqparat - Jasóspirimderdiń ákimshilik quqyq buzýshylyqtar jasaýynyń basty sebepteriniń biri - otbasy jaǵdaılaryndaǵy áleýmettik qıyndyqtar, ata-analardyń balalar tárbıesine nemquraıly qaraýy jáne óz mindetterin tıisinshe oryndamaýy.
Astana qalasy prokýratýrasynyń basqarma prokýrory Aıman Mýstafınovanyń paıymdaýynsha, jasóspirimderdiń jas erekshelikterin, sonymen qosa bizdiń eldiń ómir súrýge qatysty qalyptasqan keıbir aýyrpalyqtaryn eskere otyryp, elimizdiń jarqyn bolashaǵy úshin óskeleń urpaqtyń tárbıesi men densaýlyǵyna qatysty problemalardy jaqyn arada sheshý qajet.
Bala ósirip otyrǵan ata-analar óz qabiletteri men qarjylyq múmkindikteri sheginde balanyń dene bitiminiń, psıhologııalyq, adamgershilik jáne rýhanı durys damýyna, orta bilim alýyna barlyq laıyqty jaǵdaı jasaýlary tıis. Ata-analar óz balalaryn tárbıeleýge quqyly jáne mindetti, sondaı-aq bul rette mensinbeýshilik, jaqtyrmaý, dórekilik, qatygezdik, qorlyq, zorlyq kórsetý, uryp-soǵý nemese ony qanaý bolmaýy kerek.
Balalaryn tárbıeleý men oqytý barysynda óz mindetterin oryndamaý boıynsha sot tájirıbesinde áreket etpeýdiń ártúrli túrleri bar, solardyń saldarynan kámeletke tolmaǵandardyń tárbıesine tıisti qamqorshylyqtyń bolmaýy oryn alyp otyr. Ata-analardyń jáne olardy almastyrýshy tulǵalardyń óz mindetterin oryndaýdan jaltarý, olardyń balalardyń adamgershilik tárbıeleri jóninde qam jemegende, olardyń ýaqytyly bilim alýlaryna jaǵdaı jasamaǵanda jáne t.b. osy ispettes salqynqandylyq tanytqanda kórinis tabady.
Ózderiniń balalar aldyndaǵy zańmen belgilengen mindetterin atqarmaǵan ata-analar ákimshilik jaýapkershilikke tartylady.
Aǵymdaǵy jyly, ıaǵnı 2012 jyldyń ótken kezeńinde 349 ákimshilik is qaralyp, 310 tulǵa jaýapkershilikke tartylǵan.
Balany tárbıeleý kóptegen áreketterden turatyny belgili, biraq osy áreketterdiń ishinde eń bastysy - balanyń tárbıesine úlken kóńil bólý. Tájirıbede ata-analardyń balaǵa degen durys kóńil bólip, durys tárbıe bermegendikten jasóspirimderdiń arasynda kóptegen qylmystardyń oryn alyp otyrǵany belgili.
Mysaly, Astana qalasy Saryarqa aýdany ishki ister basqarmasynyń kámeletke tolmaǵandar jónindegi polıtsııa ınspektorynyń T. degen azamatqa qatysty ákimshilik quqyq buzýshylyq týraly qaýly toltyrǵany anyqtaldy.
Ata-ananyń 1999 jylǵy týylǵan balasynyń tárbıesimen durys aınalyspaýy, ıaǵnı onyń kúndelikti oqý sabaqtaryna barmaǵany jaýapqa tartýǵa negiz bolǵan.
Astana qalasy kámeletke tolmaǵandar isi týraly sotynyń qaýlysymen T. Degen azamat ákimshilik jaýapkershilikke tartylyp, oǵan «eskertý» túrindegi shara qoldanyldy.
Atalǵan bap kámeletke tolmaǵan balalary bar ata-analarǵa nemese ata-analardyń ornyna jaýapty tulǵalarǵa balalaryn tárbıeleýdi qadaǵalaý kezinde qoldanylady.
Bul quqyq buzýshylyqtyń sýbektisi - kámeletke tolmaǵan balalardyń ata-analary. Sondyqtan kámeletke tolmaǵan balalary bar ata-analar nemese ata-analardyń ornyna jaýapty tulǵalar balalaryna durys tárbıe bermegen jaǵdaıda ákimshilik jaýapkershilikke tartylatyndaryn bilýi qajet.
Kámeletke tolmaǵandardyń quqyqtaryn qorǵaý prokýratýralyq qadaǵalaýdyń basty baǵyttarynyń biri bolyp tabylady.
