Balalaryn qolǵa ustaǵan apaly-sińlili eki áıel qymbat býtıkterden kıim urlaǵan
TALDYQORǴAN. QazAqparat - Balqash qalasynan Almaty oblysyna «qylmystyq gastrolge» kelgen eki áıel býtıkter men dúkenderde urlyq jasady degen kúdikpen ustaldy, dep habarlaıdy QazAqparat tilshisi.
«Tergeý barysynda kúdiktilerdiń Balqash qalasynan kelgeni, qoldaryna jas balalar ustaǵan eki áıeldiń apaly-sińlili ekeni anyqtaldy. Olarǵa bir kún ishinde taýar-materıaldyq qundylyqtardy urlaýdyń bes deregin jasady degen aıyp taǵyldy», - dep málimdedi Almaty oblysy Polıtsııa departamentiniń baspasóz qyzmeti.
9 aqpanda Qarasaı aýdanynyń «MOLL APORT» saýda oıyn-saýyq kesheninde urlyq jasady degen kúdikpen 30 jáne 33 jastaǵy eki áıel ustaldy. Kúdikke ilingen áıelderdiń 1 jastan asqan jáne 7 jastaǵy búldirshinderi bar. Jeke basyn tekserý kezinde olardan áıelder men balalardyń urlanǵan jańa kıimderi tabylyp, olardyń keshen aýmaǵyndaǵy dúkenderdiń birinen jymqyrylǵany anyqtaldy. Sonymen qatar, beınebaqylaý jazbalarynyń kómegimen bultartpas aıǵaqtar arqasynda kúdiktiler budan ózge taǵy tórt býtık jáne dúkende oryn alǵan urlyqtaryn moıyndady. Úptep ketken zattaryn qaıda jasyrǵanyn kórsetken.
«Olar bir kún ishinde jalpy somasy 350 000 teńgeden asatyn somanyń taýarlaryn urlaǵan. Onyń ishinde maıka, fýtbolka, palto, djınsy jáne ózge de kıimder bar. Urlanǵan múlik qajetti tergeý áreketterinen soń zańdy ıelerine qaıtaryldy. Ózgeniń múlkin urlaýdyń bes deregi boıynsha QR Qylmystyq kodeksiniń 188-baby 3-tarmaǵyna sáıkes sotqa deıingi tergeý amaldary júrgizilip jatyr»,- dep tolyqtyrdy vedomstvo ókilderi.
Sonymen qatar, kúdiktilerdiń biriniń qylmystyq tájirıbesi bar. Ol Nursultan qalasyndaǵy býtıkterden zattardy urlaǵany úshin jaýapqa tartylyp, taraptardyń tatýlasýyna baılanysty qylmystyq is sotqa jetpeı, qysqartylǵan. Kúdiktilerdiń kámeletke tolmaǵan jas balalarynyń bar ekeni eskerilip, olar mekenjaıyn ózgertpeý týraly mindettememen bosatyldy.
