Balalaryn demalysqa basqa óńirlerge aparatyn elordalyqtarǵa eskertý jasaldy
NUR-SULTAN. QazAqparat – Nur-Sultan qalasynda karantın rejımi men shekteý sharalary jalǵasýda, dep habarlaıdy QazAqparat.
Taýarlar men kórsetiletin qyzmetterdiń sapasy men qaýipsizdigin baqylaý departamentiniń habarlaýynsha, Qazaqstanda tótenshe jaǵdaı rejımi toqtatylǵanyna qaramastan, Nur-Sultan qalasynda karantın rejımi men shekteý sharalary jalǵasýda. Bul sharalar epıdemıologııalyq jaǵdaı tolyqtaı turaqtanǵansha, ıaǵnı, qala turǵyndary arasynda COVID-19 indetine shaldyǵý jaǵdaıy barynsha tómendegenshe iske asyrylady.
Osy oraıda, basqa óńirlerge balalaryn demalysqa aparýdy josparlap otyrǵan ata-analarǵa eskertý jasalyp otyr.
Bul turǵyda Nur-Sultan qalasynyń karantındik aýmaǵynan shyǵyp, jazǵy demalysqa baratyn stýdentterge de qatysty bolyp otyr. Olar karantın aıaqtalǵansha elordaǵa qaıta kire almaıtynyn eskerýi tıis.
Tıisti qaýlyǵa sáıkes, qaladan shyǵatyn jáne shaharǵa kiretin kezde stanıtarlyq-karantındik baqylaýdy qamtamasyz etý maqsatynda blokposttar qyzmetin jalǵastyrýda. Bul sharalar koronavırýs ınfektsııasynyń taralaýyna jol bermeý aıasynda júrgizilýde.
Sonymen qatar, Aqmola oblysynyń Tselınograd, Arshaly, Shortandy aýdandarynyń turǵyndary úshin Nur-Sultan qalasy aýmaǵynan shyǵý nemese kirý talaptary kelisildi. Olar tıisti anyqtamany usyný arqyly blokposttardan óte alady.
Eger adamdar medıtsınalyq jaǵdaı boıynsha karantın aýmaǵyna kirse, onda onyń janynda ekiden artyq adam bolmaýy kerek. Bul turǵyda tıisti qujattar usynylýy kerek.
Eger de Nur-Sultan qalasy turǵyndary qandaı da bir sebeppen qalanyń karantındik aýmaǵynan tys shyǵatyn bolsa, onda shaharǵa qaıta oralǵan kezde olar úı karantınine (14 kúnge) engiziledi. Bul talap elordada jumys isteıtin Aqmola oblysynyń Tselınograd, Arshaly, Shortandy aýdandarynyń turǵyndaryna qatysty bolmaıdy.
