Balalaryn býyndyryp óltirgen erli-zaıyptylar ózderine qol salmaq bolǵan - qorǵaýshy
ALMATY. QazAqparat - Almatyda egiz uldaryn býyndyryp óltirip, tońazytqyshqa tyǵyp ketken erli-zaıyptylardyń isi boıynsha sot otyrysy ótip jatyr.
Emıl Gılmýtdınovtyń qorǵaýshysy Sarıev Amangeldiniń aıtýynsha, er adam únemi shaıtan sýdyń yqpalynda júrgen.
«Gılmýtdınov Emıl tergeý bastalǵaly beri kinásin moıyndap keledi. Balalardy kúıeýi býyndyryp óltirgen. Al ony áıeli bilgen. 5 tamyzda Tashkentten kelgende balalardy óltirsem degen oımen keledi. Sosyn páter jaldap, oıyndaǵysyn júzege asyrǵan soń sol kúni keshke dámhanaǵa baryp áıeline aıtqan. Áıeli ekeýi qosylyp araq ishken. Araqtyń kesirinen bolyp otyr ǵoı. Balalardyń anasy qasynda bolmaǵanmen, bárin bilgen. Sosyn úlken uldy ertip aparyp Ramstor saýda úıiniń qasynda tastap ketken», - dedi qorǵaýshy Amangeldi Sarıev.
Onyń aıtýynsha, erli-zaıyptylar artynan qandaı qylmys istegenin túsinip, Panfılov pen Gogol kósheleriniń qıylysynda páter jaldap sonda ózderine qol salmaq bolǵan.
«Araq ishken. Gaz plıtasyn ashyq qaldyrǵan. Biraq aman qalyp, erteńine polıtsııaǵa ózderi keldi», - dedi Amangeldi Sarıev.
Onyń aıtýynsha, erli-zaıyptylarǵa qatysty psıhologııalyq saraptama júrgizildi. Nátıjesinde densaýlyqtarynda eshqandaı aýytqý tabylmaǵan.
Ekeýi 2017 jyly tanysqan eken. Azamattyq nekeden tuńǵysh uldary Ravıl týady. 2016 jyly egiz ul týǵan.
Balalardyń bıologııalyq ákesi Emıl bolǵanmen, azamattyq neke bolǵandyqtan, kýálikte ákeleri jazylmaǵan.
Otbasynyń tabysy úsh balany asyraýǵa jetkilikti bolǵanyn aıta ketý kerek.
«Olar kúnine 5 000 teńge taýyp otyrǵan. Bul jan baǵýǵa jetedi ǵoı. Másele materıaldyq jaǵdaıda da emes, bul adamdardyń túbine araq jetken», - dedi A.Sarıev.
Basty sot otyrysy 24 qarasha tańerteńgi 10-ǵa belgilendi.
Sýdıa Volchenko men Gılmýtdınovtyń jýrnalısterdi qatystyrmaý týraly ótinishin ishinara qanaǵattandyrdy.
Aıta ketý kerek, jantúrshigerlik oqıǵa osydan eki aı buryn Túrksib aýdanynda bolǵan. Kóppáterli úılerdiń birinde tońazytqyshtyń ishinen óli sábıler tabyldy.
Eki ul balanyń ólimi mehanıkalyq asfıksııadan bolǵany anyqtaldy.
Keıin olardy týǵan ákesi Emıl býyndyryp óltirgeni belgili boldy. Sosyn múrdelerdi tońazytqyshqa salyp ketken. Er adam sotta istegenin moıyndap, balalardyń jylap uıqy bermegenin aıtqan. Bul iske olar ózara kelisimmen barǵan.
Keıin balalardyń anasy Alla Volchenko men kúıeýi úlken uldary Ravıldi Samal shaǵynaýdanyndaǵy aýlalardyń birinde tastap ketken.
Bala aýlada 3 kún júrgen kórinedi.
2-3 jastaǵy Ravıldi Samal shaǵynaýdanyndaǵy aýlalardyń birinde adamdar taýyp alyp polıtsııa shaqyrǵan.
Keıinirek polıtsııa olardy mas kúıinde taýyp alǵan.
