Balalaryma árdaıym úlgi bolǵym keledi - qyzylordalyq polıtseı

QYZYLORDA. QazAqparat -Tártip saqshylary qoǵamdyq qaýipsizdikti saqtaý baǵytynda qaı kezde de aldyńǵy shepte júredi. Qazirgi syn sátte de polıtsııa qyzmetkerleri ýaqytpen sanaspaı ózderine júktelgen mindetti abyroımen atqarýǵa kúsh salyp júr. Bul álemdi dúrliktirgen qaýipti indettiń betin qaıtarýǵa oń septigin tıgizip otyr. Osy oraıda QazAqparat tilshisi Qyzylorda qalalyq polıtsııa basqarmasynyń memlekettik avtoınspektory Arystanbek Dáýletovtiń bir kúngi tynys-tirshiligine zer salyp kórgen edi.

Sońǵy ýaqytta Arystanbektiń qyzmeti óte qaýyrt. Jer-dúnıeni jaılaǵan qaýipti kesel qursaýy Qyzylorda óńirine de kelip jetti. Sol sátten bastap jergilikti tártip saqshylary kún-tún demeı óz qyzmetin atqarýǵa kiristi. Arystanbek árbir kúni mindetin adal atqarýǵa nıet tanytady. Táýliktiń qaı ýaqytynda da qoǵam qaýipsizdigin saqtaýǵa belsendilik tanytady.

Qazir Qyzylorda qalasynda qaýipti indetten saqtanýǵa barynsha kúsh salynyp otyr. Turǵyndardyń beıbereket júrýine tyıym salynǵan. Avtokólik qozǵalysyna da shekteý jasalǵan. Bul oraıda polıtsııa qyzmetkerleriniń jaýapkershiligi erekshe. Árbir qaýipsizdik sharasyn saqtaýǵa barynsha kóńil bóledi. Arystanbek osylaısha óziniń qaýipti keselden qutylý jolynda nátıjeli is jasap júrgenin qoǵam aldyndaǵy zor mindeti sanaıdy.

«Adamdardyń barlyǵy birdeı emes qoı. Árqaısysynyń minezi san alýan. Talap barlyǵyna ortaq. Ony saqtaýǵa árbiri kóńil bólýi tıis. Ókinishtisi, keıbir azamattar oǵan kóńil bólmeıdi. Qaýipti indetten saqtaný joldaryn qaperge ilmeıdi. Onyń sońy orny tolmas jaǵdaıǵa ulasýy múmkin. Memleketimiz osy baǵytta barlyq qaýipsizdik sharalaryn qolǵa aldy. Biz sol jumystardyń óz deńgeıinde oryndalýyna barynsha úles qosamyz. Kúnde jańalyqtardy nazarǵa alyp otyramyz. Jaqsy nátıjege qýanyp jatamyz. Oń isterge óz úlesimizdi qosyp júrgenimizdi maqtanysh tutamyz», - deıdi Arystanbek.

Ol otbasynda ákesi Qasqyrbekten tózimdilik, jaýapkershilik, sabyr sekildi asyl qasıetterdi boıyna sińirip ósti. Otbasynda alǵan tárbıesi qazir qyzmetinde óz paıdasyn tıgizip keledi. Ákesi Qasqyrbek pen anasy Meıramkúl ekeýi de uzaq jyldar boıy temirjol salasynda qyzmet atqardy. Arystanbek polıtsııa qyzmetin tańdaǵanda oǵan otbasynda barlyǵy qoldaý bildirdi. Dese de úıdiń úlkenderi oǵan bul qyzmettiń jaýapkershiligi úlken bolatyny taǵy bir márte eske salyp ótti.

«Qaı kezde de otbasymdy joǵary qoıamyn. Ata-anam tálimdi tárbıe berdi. Búginde ózim de eki tárbıelep otyrmyn. Bala kezimnen anamnyń ystyq baýyrsaǵyn jep óstim. Onyń dámi áli kúnge deıin aýyzdan ketpeıdi», - dedi Arystanbek.

Ol 2012 jyly Qorqyt Ata atyndaǵy Qyzylorda memlekettik ýnıversıtetin quqyqtaný mamandyǵy boıynsha bitirgen. 2015 jyldan bastap osy ýaqytqa deıin Qyzylorda qalalyq Polıtsııa basqarmasynyń ákimshilik polıtsııa bóliminiń jol jáne tehnıkalyq tobynyń memlekettik avtoınspektory qyzmetin atqarady. Qazir aǵa leıtenant sheninde.

Ol - saýatty, jaýapkershiligi mol azamat. Áriptesteri onyń qarapaıym, adal, jaýapty, qıyn sátte kómekke kelýge ekendigin aıtady. Minsiz qyzmeti úshin birneshe márte marapattalǵan. Jubaıy Aıda Abdramanova ekeýi 2013 jyly shańyraq kóterdi. Aıda oblystyq medıtsına ortalyǵynyń dárigeri qyzmetin atqarady. Olar búginde Beıbarys pen Álıhan esimdi uldaryn tárbıeleýde.

«Men qyzmetke kelgende otbasyly edim. Polıtsııa qyzmetiniń jaýapty jáne aýyr ekenin alǵashqy kúnnen-aq túsinemin. Balalarym - ómirimniń máni, sharshaǵanda kóńilimdi aýlaıdy. Úlkenim - Beıbarys 5 jasta, onymen sóılesip, aqyldasý óte qyzyq. Jaqsy sýret salady. Bizdi jetistikterimen qýantyp otyrady. Ózim sportpen shuǵyldanamyn, tańerteń júgiremin. Balalarmen birge jattyǵý jasap, fýtbol oınaımyz. Balalaryma árdaıym úlgi bolǵym keledi», - deıdi Arystanbek.

Elimizde jarııalanǵan tótenshe jaǵdaı rejıminde Arystanbek pen Aıda kóp ýaqytty jumysta ótkizedi . Otaǵasy patrýldik bekette tynymsyz qyzmet etedi. Al Aıda medıtsınalyq qyzmetker bolǵan soń shuǵyl shaqyrtýmen jumysyna jıi barady. Mundaı ýaqytta balalarǵa ájesi qaraıdy. Barlyǵy otbasyna túgel oralǵanda shańyraq shýaǵy shattyqtan shalqı túsedi.