Balalarym da, nemerelerim de barlyq vaktsınany saldyrǵan – Esmaǵambetova
«Meniń eki balam bar. Olar keńestik kezde belgilengen kúntizbe boıynsha barlyq ekpeni alǵan. Ol kezde vaktsınadan bas tartý jóninde tipti oılamaıtynbyz. Sol ekpeler úshin alǵys aıtamyn. Sebebi túrli juqpaly aýrýlar shyqqanda meniń balalarym aýyrǵan joq. Qazir eki nemerem bar. Úlkeni – eki jasta, kishisi – bir jasta. Naǵyz mindetti 11 ekpeni alatyn jasta jáne barlyq vaktsınany alyp kele jatyr. Munda meni keremet vaktsınalar salǵyzdy dep oılamańyzdar. Ekeýi de turǵylyqty mekenjaıy boıynsha, Tegin medıtsınalyq kómektiń kepildendirilgen kólemi aıasynda barlyq balalar alyp jatqan ekpelerdi salǵyzdy», - dedi bas sanıtarlyq dáriger Facebook-te ótken onlaın-brıfıngte.
Spıkerdiń aıtýynsha, vaktsına – balalardy epıdemııadan, juqpaly balalar aýrýynan qorǵaýdyń jalǵyz amaly.
«Biz umytyp ketken aýrýlar kóp jáne olar qaıtyp kelmesteı kórinedi. Biraq, ujymdyq ımmýnıtetimiz 90 paıyzdan túsip ketse, birden dıfterııa, sirespe aýrýlaryna qaıta oralamyz. Onyń saldary aýyr bolyp, tipti balalar kóz jumýy da múmkin. Al balalardy qorǵaý múmkindigin memleket tegin berip otyrǵanda, ony paıdalaný kerek», - dedi A. Esmaǵambetova.
Buǵan deıin A. Esmaǵambetova vaktsınanyń mindetti jáne erikti bolyp ekige bólinetinin, ata-analar vaktsınadan bas tartýǵa quqyly ekenin aıtqan bolatyn.