Balalarmen ushýǵa qandaı talaptar men jeńildikter usynylady

ASTANA. KAZINFORM — Áýe kompanııalary kámeletke tolmaǵan jolaýshylardy tasymaldaý úshin naqty qandaı sharttar belgilegen? Qaı jasta qandaı qujat qajet, balalarǵa qandaı talaptar qoıylǵan, bılet baǵasy qalaı esepteletini jóninde Kólik mınıstrligi málim etti. 

 

Balalardy súıemeldeý tártibi:

• 0–6 jas: Tek eresek jolaýshymen birge usha alady.

• 6–16 jas: Tek áýe kompanııasy «Kámeletke tolmaǵan balany alyp júrý» qyzmetin rásimdegen jaǵdaıda óz betinshe usha alady.

• Balanyń ata-anasy (nemese zańdy ókili) jazbasha ótinish bergennen keıin ǵana bala jalǵyz usha alady. 

• Kámeletke tolmaǵan balamen ushatyn eresek adamnyń qolynda balanyń týý týraly kýáligi jáne týystyqty/zańdy ókilettilikti rastaıtyn qujat bolýy tıis.

• Saǵat 23:00–06:00 aralyǵynda kámeletke tolmaǵandar ata-anasynsyz, zańdy ókilsiz ushaqqa otyrǵyzylmaıdy (QR «Balanyń quqyqtary týraly» Zańyna sáıkes).

• Jalǵyz ushatyn balaǵa bılet keminde 5 kún buryn brondalýy tıis.

• Bala tirkelip, ushaqta arnaıy qaýipsiz orynǵa jaıǵasady.

• Ushý aldynda ata-analar reıs keshigýi múmkin ekenin eskerip, balamen birge áýejaıda qalýy tıis.

• Ushaq qonǵannan keıin balany áýejaı qyzmetkeri qarsy alady, qujattar tekserilgen soń ol tek jeke kýáligi bar eresek adamǵa tapsyrylady.

Balalar úshin bılettiń quny:

 

• Eresek jolaýshynyń súıemeldeýimen halyqaralyq jáne ishki reısterde 2 jasqa deıingi balalar tegin tasymaldanady (bólek orynsyz jáne tegin bagajsyz).
• 2 jasqa deıingi balalar halyqaralyq nemese ishki reısterde bólek oryndyqpen tasymaldanatyn bolsa, tıisti qalypty tarıftiń 50% tólenedi.
• Halyqaralyq reısterde 2 jasqa deıingi ekinshi jáne odan keıingi kámeletke tolmaǵandar úshin de tıisti qalypty tarıftiń 50% tólenedi. 
• 2 jastan 12 jasqa deıingi balalar halyqaralyq reısterde, 2 jastan 15 jasqa deıingi ishki reısterde eresek jolaýshynyń súıemeldeýimen tıisti qalypty tarıftiń 50% mólsherinde tasymaldanady.
• Jasyna qaramastan, áýebılet qunynyń tıisti qalypty tarıftiń 50% tólengen árbir kámeletke tolmaǵan jolaýshyǵa bólek oryn beriledi jáne bagajdy tegin alyp júrýge ruqsat beriledi. Tegin joljúk normasynan asatyn joljúk tarıf boıynsha tólenedi.
• Bala ata-anasynyń tizesinde ushatyn bolsa da, ony brondaý kezinde qosý jáne tirkeý kezinde oǵan otyrǵyzý talonyn alý kerek ekenin este ustaǵan jón. 

Eske sala keteıik, buǵan deıin FlyArystan áýekompanııasynyń salǵyrttyǵynan egizdiń syńary  ushaqtan qalyp qoıǵanyn jazǵan bolatynbyz. 

Osy oqıǵa boıynsha áýekompanııasy Zereniń anasyna 5 mln teńge aıyppul tóledi.