Balalarmen sýǵa shomylýǵa barǵanda neni eskerý kerek
ASTANA. QazAqparat - Qazaqstandyq qutqarýshylar sýǵa balalarmen birge shomylǵan kezde qandaı qaýipsizdik sharalaryn saqtaý kerektigi týraly aıtty, dep habarlaıdy QazAqparat tilshisi.
«Kóptegen otbasy jazdyń ystyq kúnderin sý jaǵasynda ótkizgendi qalaıdy. Úlkender men kishkentaı balalar da qýana sýǵa túsip, taza aýamen demalyp, kúnge qyzdyrynady. Biraq sýǵa túsken kezde qaýipsizdikti nazardan qaldyrmaý kerek», - deıdi Taldyqorǵan qalalyq tótenshe jaǵdaılar basqarmasynan.
Osyǵan oraı qutqarýshylar mynadaı keńes beredi:
- Balalarǵa úlkenderdiń qaraýyńsyz sýǵa shomylýǵa ruqsat etpeńiz, ásirese úrlemeli matrastar nemese úrlemeli dońǵalaqtarmen;
- Sýǵa tek kúrteshe nemese jeńge kıetin qutqarý quraldarymen ǵana jiberińiz;
- Sýdyń astyna tyǵylatyn nemese bir-birin tunshyqtyratyn oıyndardy oınaýǵa ruqsat etpeńizder. Mundaı oıyndardyń arty qaıǵyly oqıǵalarǵa alyp keledi;
- Shomylý belgileri joq jáne tanys emes jerde súńgýge ruqsat etpeńizder, ol jerlerde bolýy múmkin tastar men aǵash qaldyqtary jaraqat alýǵa sebep bolýy múmkin;
- Sýyq tımeýi úshin balanyń sýda shomylý ýaqytyn qadaǵalańyz;
- Kún sáýlesinen kúıip qalmaý úshin balanyń denesine arnaıy kúnnen qorǵaıtyn jaqpaı maı jaǵyńyz.
Degenmen, tótenshe jaǵdaılar qyzmetiniń basty keńesi balany sýda qaraýsyz qaldyrmaý bolyp otyr.
«Balalardy qatań baqylańyzdar, olardy úlkenderdiń baqylaýynsyz qaldyrmańyzdar. Balalarǵa tek arnaıy jabdyqtalǵan oryndar men jerlerde úlkenderdiń qadaǵalaýymen ǵana shomylýǵa ruqsat etińizder. Balalarǵa úrlemeli matrastarmen, kameralarmen, taqtaılarmen, úrlemeli oıynshyqtarmen sýda júzýge qatań tyıym salynady. Olardy jaǵadan jel nemese aǵyn alysqa alyp ketýi múmkin, al bul kómek kórsetýge qıyndyq týǵyzady», - dep atap ótedi Taldyqorǵan qalalyq tótenshe jaǵdaılar basqarmasynan.
