Balalarmen saparǵa shyqqanda neni bilý qajet
ASTANA. KAZINFORM – Balańyzben birge kólikpen saparǵa shyǵýdy josparladyńyz ba? Ol úshin saparyńyzdyń jaıly ári qaýipsiz bolýy úshin aldyn ala qamdanyńyz.
QazAvtoJol júrgizýshilerge jolǵa shyqpas buryn kólikti daıyndaý keregin eskertti.
- Aldymen dóńgelekterdegi aýa qysymyn tekserińiz. Bul kóliktiń basqarylýy men turaqtylyǵyna áser etedi.
- Jaryq, tejegish, burylys shamdarynyń jumysyn tekserińiz. Bul qaýipsizdiktiń basty elementteriniń biri.
- Tejegish júıesiniń jumysyn jáne áınek tazalaǵyshty tekserińiz. Qolaısyz aýa raıy kezinde óte qajet.
- Joldy jaqsy kórý úshin aına baptaýlaryn retke keltirińiz.
- Balalarǵa arnalǵan avtooryndyqtyń durys ornatylǵanyn, balanyń qaýipsizdik beldigin taqqanyna nazar aýdaryńyz.
Jas erekshelikterine qaraı balalardy tasymaldaý erejeleri:
1 jasqa deıin
Náresteni qozǵalys baǵytyna qarsy ornatylǵan avtobesikpen (0+ sanaty) tasymaldaıdy. Besikti aldyńǵy oryndyqqa da, artqy oryndyqqa da qoıýǵa bolady, aldyńǵy oryndyqqa qoıǵan jaǵdaıda qaýipsizdik kópshigin ajyratý kerek.
1 jastan 7 jasqa deıin
Bul jastaǵy balalar bıiktigi men salmaǵyna sáıkes keletin balalarǵa arnalǵan ustaǵyshta (avtooryndyqta) bolýy kerek. Aldyńǵy jáne artqy oryndyqqa da otyrǵyzýǵa ruqsat etiledi, biraq aldyńǵy jaǵyna ornatylǵan kezde qaýipsizdik kópshigin óshirý kerek.
7 jastan 11 jasqa deıin
Eger balanyń boıy 150 sm-den joǵary bolsa, siz standartty qaýipsizdik beldigin paıdalana alasyz. Áıtpese, tek avtooryndyq nemese býsterdi paıdalaný qajet. Aldyńǵy oryndyqta tek ustaǵysh qurylǵyda otyrǵyzý kerek.
12 jastan bastap
Shtattyq qaýipsizdik beldigin paıdalanyp kez kelgen jolaýshylar ornynda tasymaldaýǵa ruqsat etiledi. Qosymsha qurylǵylar qajet emes.
Qatań tyıym salynady:
- Balalardy shanaqta nemese tirkemede tasymaldaý.
- Qozǵalys kezinde balany qolda ustap otyrýǵa bolmaıdy, sebebi apat kezinde ony qolda ustaı almaısyz.
- Toqtaǵan kezde de 7 jasqa deıingi balalardy kólikte qaraýsyz qaldyrý.
- Qolaıly saparǵa arnalǵan paıdaly keńester:
- Sý, jeńil taǵamdar jáne júrek aınýdy basatyn dárilerdi ózińizben birge alyńyz.
- Sapardy jáne aıaldamalardy aldyn ala josparlaýdy umytpańyz.
- Balańyz ózin jaıly sezinýi úshin súıikti oıynshyqtaryn nemese kitaptaryn birge alyńyz, biraq júrgizýshini alańdatpaýdy qadaǵalańyz.
Aıta keteıik, TJM júrgizýshilerge eskertý jasady.