Balalarmen bolǵan jazataıym oqıǵalar úshin muǵalimderdi jazalaýǵa jol berilmeıdi — mınıstr
ASTANA. KAZINFORM — Almatyda «Bilim keleshegi: adal azamat, kásibı maman» dástúrli qalalyq pedagogter konferentsııasy ótti. Іs-sharaǵa 2,5 myńnan astam pedagog, sondaı-aq memlekettik organdardyń, úkimettik emes jáne halyqaralyq uıymdardyń ókilderi qatysty.
Plenarlyq otyrys Oqý-aǵartý mınıstri Ǵanı Beısembaev pen Almaty qalasynyń ákimi Darhan Satybaldynyń qatysýymen ótti.
Mınıstr óz sózinde memleket tarapynan bilim berý júıesin damytý, pedagogterdi qoldaý jáne balalardyń quqyqtaryn qorǵaý baǵytynda aýqymdy sharalar qabyldanyp jatqanyn atap ótti.
— Memleket basshysy respýblıkalyq tamyz konferentsııasynda muǵalimderdiń quqyqtaryn qorǵaý, olardy pedagogke sáıkes kelmeıtin mindetterden bosatý qajettigin erekshe atap ótti. Jergilikti atqarýshy organ tarapynan zań óreskel buzylǵan jaǵdaıda prokýratýra organdary aralasýy tıis. Sondaı-aq balalarmen bolǵan jazataıym oqıǵalar úshin muǵalimderdi jazalaýǵa jol berilmeıdi, — dedi mınıstr.
Ǵanı Beısembaev óz sózinde 2025-2026 oqý jylynyń jańalyqtaryna da toqtaldy. Atap aıtqanda, «Tsıfrlyq saýattylyq» jáne «Informatıka» pánderine jasandy ıntellekt elementteri engizile bastaıdy. Ol úshin orta bilim berý júıesinde AI qoldanýdyń etıkalyq standarttary bekitildi. Oqýshylar úshin Day of AI onlaın kýrstary, al pedagogter úshin arnaıy biliktilikti arttyrý baǵdarlamalary ázirlendi.
Memleket basshysynyń tapsyrmasy boıynsha «Keleshek mektepteri» ulttyq jobasynyń mektepterin basqarýdyń jańa modeli ázirlendi. Jaıly mektepterde jumys isteıtin 3 myńnan astam pedagog úsh deńgeıli daıyndyqtan ótti. Qyrkúıek aıynan bastap model is júzinde engizile bastaıdy, al ádistemelik qoldaýdy Y. Altynsarın atyndaǵy ulttyq bilim akademııasy qamtamasyz etedi.
Inklıýzıvti jáne arnaıy bilim berýdi damytý memlekettik saıasattyń negizgi basymdyqtarynyń biri bolyp tabylady. 2025 jyldyń qazan aıynda Almaty qalasynda sheteldik bilim mınıstrleri men jetekshi halyqaralyq sarapshylardyń qatysýymen ınklıýzııa boıynsha Birinshi Dúnıejúzilik kongress ótedi. Sondaı-aq, Abaı atyndaǵy respýblıkalyq mektep-ınternatyn «Abaı Ulttyq mektebi» retinde transformatsııalaý jalǵasyp jatyr.
Konferentsııa sońynda Oqý-aǵartý mınıstrliginiń vedomstvolyq nagradalary jáne ákimdiktiń «Úzdik bilim berý uıymy — 2025» arnaıy syılyǵy tabystaldy.
Jumysshy mamandyqtar jyly aıasynda Oqý-aǵartý mınıstri Almatynyń bilim berý uıymdarynyń tehnıkalyq qyzmetketkerlerine nagradalar tabys etti. Marapattalǵandardyń qatarynda: № 176 mektep-gımnazııasynyń santehnıgi Raıymbek Ótenııazov, № 206 mekteptiń elektrıgi Baǵlan Esenbaev, № 58 orta mekteptiń kishi qyzmetkeri Nazerke Mangına, № 121 mekteptiń aýla sypyrýshysy Janat Sarıstanov jáne № 110 mektep-gımnazııasynyń elektrıgi Abzal Qasymbekov bar.
Aıta ketelik oqýshylardy mektepke daıyndaý úshin ata-analarǵa shamamen 20 mlrd teńge aýdaryldy.