Balalarynyń aldyndaǵy mindetterin oryndamaıtyn ata-analar kóbeıdi – depýtat
ASTANA. KAZINFORM – Sońǵy 5 jylda balalarynyń aldyndaǵy mindetterin oryndamaıtyn ata-analar sany 6 ese kóbeıgen. Bul týraly Quryltaıdy «Qazaqstan balalary» tujyrymdamasyn talqylaýǵa arnalǵan Úkimet saǵatynda depýtaty Ásel Qaıyrova aıtty.
- Sońǵy jyldardaǵy statıstıka ata-analardyń óz mindetterin oryndamaý faktileri aıtarlyqtaı kóbeıgenin kórsetedi. Bes jyl ishinde mundaı quqyq buzýshylyqtar sany shamamen 6 ese ósip, 2020 jylǵy 6 myńnan 2026 jyly 30 myńǵa jetken. Al túngi ýaqytta balalardyń kóshede júrý jaǵdaılary eki ese kóbeıip, 110 myńnan asqan. Eresekterdiń jaýapsyzdyǵy men balalarǵa tıisti baqylaýdyń bolmaýy saldarynan terezeden qulaý jáne jol-kólik oqıǵalary kezinde balalar óliminiń jartysynan astamy oryn alady,- dedi ol.
Depýtattyń aıtýynsha, búginde balalar arasyndaǵy sýıtsıd jaǵdaılarynyń 60 paıyzy otbasyndaǵy kúrdeli qarym-qatynasqa, psıhologııalyq qysym men qatygezdikke baılanysty. Bul máselelerdi sheshý úshin Tujyrymdamada ata-analarǵa arnalǵan jaýapty tárbıe berý jónindegi mindetti kýrsty engizý usynylǵan. Osyǵan baılanysty Mádenıet jáne aqparat mınıstrligine birneshe suraǵym bar. Bul kýrstyń ereksheligi nede? Ol atalǵan kórsetkishterdiń kúrt ósýin toqtatýǵa qalaı yqpal etedi? Eń bastysy, ony is júzinde qalaı engizýdi josparlap otyrsyzdar?, - surady ol Mádenıet vıtse-mınıstri Álı Rýstannan.
Saýalǵa jaýap bergen vıtse-mınıstrdiń aıtýynsha, «Ata-analar akademııasy» jobasy 2025 jyly 5 óńirde pılottyq rejımde qosyldy. Qazirgi ýaqytta ol elimizdiń barlyq óńirinde jumys isteıdi. Bıyl jyl basynan beri 40 myńnan astam adam oqýmen qamtyldy. Óńirlerde 70-ten astam dáris, trenıng, semınar jáne sheberlik sabaqtary ótkizildi. Sabaqtar balalardyń qaýipsizdigi men densaýlyǵy, býllıngtiń profılaktıkasy, balanyń emotsıonaldyq damýy jáne otbasyndaǵy qarym-qatynas máselelerine arnalǵan.
- Jobanyń «Ata-ana.kz» onlaın platformasynda ata-analar psıholog, zańger nemese dárigerdiń keńesin tegin ala alady. Sondaı-aq balalardy tárbıeleý jáne olardyń qaýipsizdigi jónindegi materıaldarmen tanysady. Qazirgi tańda Jasandy ıntellekt jáne tsıfrlyq damý mınıstrligimen birlesip, Smart Bridge portaly arqyly qosylý máselesin pysyqtap jatyrmyz.
Aqparattyq-kommýnıkatsııalyq tehnologııalar jáne aqparattyq qaýipsizdik salasyndaǵy talaptardy eskere otyryp, osy jumysty merziminen buryn, 2027 jyldyń birinshi jartyjyldyǵynda aıaqtaý josparlanyp otyr, - dedi Álı Rýstamov.
Aıta keteıik, «Qazaqstan balalary» tujyrymdamasynyń iske asyrylýyna bes jylǵa 1,3 trln teńge qarastyrylǵan.
https://kaz.inform.kz/news/kazakstan-balalari-tuzhirimdamasinin-orindalu-karkini-kalay-316968b5/