Balalaryna tárbıe bermegen 1 057 ata-ana ákimshilik jaýapkershilikke tartyldy
ASTANA. KAZINFORM – Balalaryna tárbıe bermegen 1 057 ata-ana ákimshilik jaýapkershilikke tartyldy. Bul týraly ІІM Ákimshilik polıtsııa komıtetiniń aǵa ınspektory Aqmaral Serikbaeva aıtty.
«Turǵylyqty jeri boıynsha polıtsııanyń profılaktıkalyq esebinde turǵan barlyq adamdar, sondaı-aq qolaısyz otbasylar tekserildi. Búgingi tańda esepte quqyq buzýshylyq pen qylmys jasaǵan 120 myń adam tur. Baqylaý barysynda belgilengen shekteýlerdiń 1,5 myń buzýshylyǵy anyqtaldy. Qorǵaý nusqamasyn buzǵan 557 agressor jáne minez-qulyqqa qoıylǵan erekshe talaptardy oryndamaǵan 531 quqyq buzýshy qamaýǵa alyndy. Balalaryn tárbıeleý boıynsha mindetterdi oryndamaıtyn 8 myń ata-ana esepke qoıyldy. Onyń ishinde 1 057 ata-ana ákimshilik jaýapkershilikke tartyldy», - dedi ol ІІM baspasóz qyzmeti alańynda ótken brıfıngte.
Onyń atap ótýinshe, 201 fakti boıynsha kámeletke tolmaǵandardyń isteri jónindegi komıssııaǵa ata-ana quqyǵynan aıyrýǵa materıaldar jiberildi. Mysaly, Petropavlda jas ana emhanaǵa shaqyrylǵan ýaqytta balasyn alyp kelmeı júrgeni týraly pedıatrdan habarlama kelip túsken. Tekserý kezinde jas ananyń ishimdik ishkeni, náresteniń shuǵyl kómekke muqtaj ekeni belgili bolǵan.
«Polıtsııa balany náresteler úıine ornalastyryp, al anasyn narkolog dárigerdiń esebine qoıdy jáne ákimshilik jaýapkershilikke tartty. Sot sheshimi boıynsha alkogolızmmen aýyratyn 206 adam narkologııalyq uıymdarǵa májbúrlep emdeýge jatqyzyldy. Júktelgen mindetterden qasaqana jaltarǵany úshin sottalǵan 101 adamǵa qatysty, sottarǵa jazasyn óteýden shartty túrde merziminen buryn bosatýdyń kúshin joıý týraly usynymdar jiberildi», - dedi Aqmaral Serikbaeva.
