Balalaryn óltirgen ana turmystyq zorlyq-zombylyq qurbany ma – ІІM jaýaby

ASTANA. KAZINFORM – Eki balasyn tunshyqtyryp óltirgen áıeldiń turmystyq zorlyq-zombylyq qurbany bolý yqtımaldyǵy tekseriledi. Bul týraly ІІM Ákimshilik polıtsııa komıtetiniń erekshe tapsyrmalar jónindegi aǵa ınspektory Aqmaral Serikbaeva aıtty.

«Qazirgi ýaqytta bul oqıǵa boıynsha qylmystyq is qozǵalyp, mınıstrlik tarapynan qatań baqylaýǵa alyndy. Zańǵa sáıkes, qylmystyq is boıynsha málimetter ázirshe qupııa, aıtýǵa bolmaıdy. Al bul otbasynda buryn turmystyq zorlyq-zombylyqtyń oryn alǵany ne almaǵany qylmystyq isti tergeý aıasynda tekserilip jatyr. Anyqtalatyn bolady. Bir aıta keterlik jaıt, ol otbasynan Qyzylorda oblysynda da, Túrkistan oblysynda da turǵanda ishki ister organdaryna eshqashan shaǵym túspegen. Biraq, áıelder otbasynda zorlyq-zombylyqqa kónip, aryz bermeı júrýi de múmkin. Sondyqtan onyń bári qylmystyq isti tergeý barysynda tekserilip, qorytyndysy shyǵarylady», - dedi ol Ortalyq kommýnıkatsııalar qyzmetindegi dóńgelek ústel barysynda.

Onyń atap ótýinshe, qylmystyq isterdi tergeý barysynda mundaı jaıttardyń bári sońyna deıin tyńǵylyqty qaralady.

«Mundaı qylmystyq isterdiń qorytyndysynda kóbine otbasylyq qıynshylyqtardyń sebep bolǵany anyqtalady. Sonymen qatar qylmysty jasaǵan adam mineziniń psıhıkalyq aýytqýlary da sebep bolady», - dedi ol.

Esterińizge sala ketsek, 7 aqpan kúni Túrkistan qalasynda jaldamaly páterlerdiń birinen eki jas balanyń máıiti tabyldy.

Keıin atalǵan qylmysty jasaý kúdigimen balalardyń 31 jastaǵy anasy ustaldy.