Ispanııadaǵy fýtbol týrnırine balalaryn jibermek bolǵan ata-analar alaıaqqa aldanyp qaldy
ASTANA. KAZINFORM — Astanada balalardy halyqaralyq fýtbol týrnırine aparýdy syltaý etip, ata-analardan aqsha alǵan adam sottaldy.
Sotta anyqtalǵandaı, sottalǵan adam ata-analardy jas fýtbolshylardyń Ispanııaǵa «barlyǵy qamtylǵan» tarıf boıynsha saparyn uıymdastyratynyna sendirgen. Ol týrnırge qatysý aqysy, áýe bıletteri, vızalyq qyzmetter, balalardy alyp júrý jáne sporttyq kıim satyp alý sııaqty shyǵyndardy tóleý úshin ata-analardan aqsha alǵan.
Alaıda keıin ol ózine alǵan mindettemelerin oryndamaǵan. Alynǵan qarajatty óz qalaýy boıynsha paıdalanǵan.
Onyń áreketinen toǵyz adam zardap shekken. Olarǵa keltirilgen materıaldyq zalaldyń jalpy somasy 24 mln teńgeden asty.
Sot úkimimen alaıaqtyq jasaǵan adam 3 jyl 2 aıǵa bas bostandyǵynan aıyryldy. Keltirilgen zalal sottalǵan adamnan óndirip alyndy.
Qala prokýratýrasy balalardyń sheteldegi sporttyq jarystarǵa qatysý saparyn uıymdastyrý kezinde ata-analarǵa saq bolýǵa keńes berdi. Uıymdastyrýshylardyń ókilettigin, týrnırge resmı shaqyrýdyń, tıisti sharttardyń, áýe bıletteriniń jáne brondaýdy rastaıtyn qujattardyń bar-joǵyn aldyn ala tekserý qajet.
Prokýratýra tek aýyzsha ýádege senip, iri kólemde aqsha bermeýge úndedi.
Eske salaıyq, buǵan deıin Aqtóbede páter almaq bolǵan 59 adam alaıaqtarǵa aldanyp qalǵanyn jazǵanbyz.
