Balalarǵa zorlyq-zombylyq kórsetý áreketterine júrgizilgen zertteý nátıjeleri jarııalanady
ASTANA. 26 mamyr. QazAqparat - Erteń, 27 mamyr kúni elordada Qazaqstan Respýblıkasyndaǵy Adam quqyqtary jónindegi ýákil men Qazaqstandaǵy BUU Balalar qory arasyndaǵy yntymaqtastyq týraly Memorandým aıasynda Qazaqstannyń memlekettik ınternat mekemelerinde balalarǵa zorlyq-zombylyq kórsetý áreketterine júrgizilgen zertteýdiń nátıjeleri tanystyrylady.
Bul týraly Adam quqyqtary jónindegi ýákil qyzmetiniń baspasóz qyzmeti habarlaıdy.
Atalmysh zertteý eldiń ınstıtýtsıonaldyq mekemelerinde balalar quqyqtarynyń buzylýy faktilerin ashatyn alǵashqy zertteý bolyp tabylady. Ony ótkizýdegi maqsat - balalarǵa kórsetiletin qataldyq áreketterin anyqtaý jáne monıtorıng júrgizýdiń jańa joldaryn baıqaýdan ótkizý, sondaı-aq Qazaqstannyń balalar ınternat mekemelerinde zorlyqqa baılanysty qalyptasqan jaǵdaıdyń jan-jaqty kórinisin aıqyndaý bolyp tabylady.
Dóńgelek ústeldiń jumysyna QR Parlamenti Májilisiniń depýtattary, QR Prezıdenti Ákimshiliginiń, ortalyq jáne jergilikti memlekettik organdardyń, dıplomatııalyq ókildikterdiń, ǵylymı ortalardyń, halyqaralyq jáne qoǵamdyq uıymdardyń ókilderi qatysady dep kútilýde.
