Balalarǵa zorlyq-zombylyqty lańkestik qylmyspen teńestirý qajet – Májilis depýtaty

ASTANA. KAZINFORM – Balalarǵa zorlyq-zombylyqty lańkestik qylmyspen teńestirý qajet. Mundaı pikirdi BIZDIÑ ORTA podkasynda Májilis depýtaty Magerram Magerramov bildirdi.

- Menińshe, balalarǵa qatysty zorlyq-zombylyqty lańkestik qylmyspen teńestirý kerek. Eger mundaı adamdar bizdiń qoǵamymyzda bolmasa, onda ol áldeqaıda qaýipsiz ári jaqsy bolar edi. Men pedofılderdi ólim jazasyna kesý kerek dep esepteımin, - dedi depýtat.

Onyń paıymynsha, memleket olardy ómir boıyna túrmede ustaýy kerek emes, keıin olardy emdeýge de aqsha jumsamaýy tıis.

- Ómir boıy sottalǵandar ózderin jaqsy sezinedi, tipti jaıly ómir súrip jatyr. Eger biz mundaı qylmyskerlerdi ómir boıyna qamamasaq, onda birinshiden, sottalǵandar sany artady, ekinshiden, bul «adamdardy» bıýdjettiń esebinen taǵy da kútip-ustaýǵa týra keledi, - deıdi Májilis depýtaty.

Depýtattyń atap ótýinshe, balaǵa seksýaldy zorlyq-zombylyqty aıtpaǵannyń ózinde ony soqqyǵa jyǵý múldem qabyldanbaıtyn jaǵdaı. Mundaı jaraqat adamnyń ómir boıy júreginde qalady. Onyń aıtýynsha, nazar qylmyskerlerge emes, múldem aıtylmaıtyn qurbandarǵa aýdarylýy tıis.

- Qansha ýaqyt boıy qylmys jasaǵan týraly aıtyp kelemiz. Olardy qalaı emdeý, qalaı qamqorlyq jasaý joldaryn izdeımiz. Biraq nelikten árdaıym qurbandardy umytyp ketemiz? Qylmystyq jaýapkershilik jasyn tómendetý týraly másele kótergende, maǵan «bul balalar ǵoı» dep qarsy shyqty. Alaıda, nege qurbandar týraly sóz qozǵamaımyz? Biz olardy umytyp ketemiz, - dedi ol.

Májilis depýtaty psıhologııalyq kómek ortalyqtary men mektep psıhologtarynyń kóp bolýyna qaramastan elde jasóspirimderdiń sýıtsıd jasaýy azaımaı otyrǵanyn aıtady.

Onyń pikirinshe, zorlyq-zombylyq qurbandarymen jumys isteý tásilderin ózgertý qajet.

Eske sala ketsek, buǵan deıin Іshki ister mınıstrliginiń pedofılderdi ómir boıy baqylaýǵa alý jospary baryn habarlaǵan edik.

Aıta keteıik, elimizde pedofılderge túrmeden shyqqanǵa deıin kastratsııa jasalmaq.