Balalarǵa zııan: Meta-ǵa 1,4 trıllıon dollar aıyppul salynýy múmkin
ASTANA. KAZINFORM — Kalıfornııa soty Meta korporatsııasyn Facebook pen Instagram áleýmettik jelileriniń jumys isteý tásilin ózgertýge mindetteýi múmkin. AQSh-tyń tórt shtaty kompanııany jastardy áleýmettik jelilerge táýeldi etetin platformalar quryp, olardyń zııany týraly belgili bolǵan aqparatty jasyrdy dep aıyptap otyr. Bul týraly 24 kg málim etti.
18 tamyzda Kalıfornııa shtatynyń Oklend qalasyndaǵy federaldyq sotta Meta kompanııasyna qarsy mańyzdy sot protsesi bastaldy. Kentýkkı shtatynyń bas prokýrory bul isti AQSh tarıhyndaǵy tutynýshylardyń quqyqtaryn qorǵaýǵa qatysty eń iri sot protsesi dep atady.
Bul is boıynsha qabyldanatyn sheshim Facebook pen Instagram-nyń jumys isteý tártibine, sondaı-aq jalpy áleýmettik jelilerdi qoldaný tásiline ózgeris engizýi múmkin.
Sotqa talap aryzdy Kalıfornııa, Kolorado, Kentýkkı jáne Nıý-Djersı shtattary berdi. Olar 29 shtattan turatyn keń aýqymdy koalıtsııanyń atynan áreket etip otyr. Bul shtattar 2023 jyly Meta kompanııasynyń qaýipsizdik talaptaryn saqtaý tájirıbesine júrgizilgen kópshtattyq tergeýden keıin alǵash ret sotqa júgingen. Qazirgi sot protsesin júrgizý úshin osy tórt shtat tańdalǵan.
Talap aryzda Meta kompanııasy Facebook pen Instagram-dy jas qoldanýshylardyń áleýmettik jelide múmkindiginshe uzaq ýaqyt otyrýyna jáne táýeldi bolýyna yqpal etetindeı etip ádeıi jasaǵany aıtylǵan. Sondaı-aq kompanııa ózine balalar men jasóspirimderdiń psıhıkalyq densaýlyǵyna keletin zııan týraly belgili bolǵan aqparatty jasyrdy degen aıyp taǵylyp otyr.
— Meta Facebook pen Instagram-dy balalardyń bul platformalarda kóbirek ýaqyt ótkizýine jaǵdaı jasaıtyndaı etip qurdy. Bul olardyń fızıkalyq jáne psıhıkalyq densaýlyǵyna zııan keltirýi múmkin. Qoǵamnyń eń osal toptaryn korporatıvtik paıdany arttyrý úshin paıdalaný — moraldyq turǵydan da, zań turǵysynan da durys emes, — dedi Kalıfornııanyń bas prokýrory Rob Bonta.
Meta kompanııasy taǵylǵan aıyptardy joqqa shyǵarady. Kompanııa ókiliniń aıtýynsha, shtattar eshkimniń aldanǵanyn nemese kompanııa áreketinen zııan shekkenin dáleldeıtin naqty derek usynbaǵan. Sondaı-aq ol shtattardy faktilerge súıenýdiń ornyna «orasan zor ótemaqyǵa qol jetkizýge umtylyp otyr» dep aıyptady.
Kompanııanyń málimetinshe, shtattar Meta-dan 1,4 trıllıon dollarǵa deıin aıyppul óndirip alýdy talap etip otyr. Bul soma korporatsııanyń naryqtaǵy jalpy qunyna shamalas.
Sot protsesine kómektesý úshin segiz alqabıden turatyn keńesshi top tańdalǵan. Alaıda túpkilikti sheshimdi alqabıler emes, sýdıa qabyldaıdy.
Talap aryz berýshiler Instagram men Facebook-tyń jumys isteý tásiline túbegeıli ózgerister engizýdi talap etip otyr. Atap aıtqanda, olar áleýmettik jelilerdegi sheksiz lenta arqyly úzdiksiz tómen qaraı jyljytý fýnktsııasynan jáne jarııa túrde kórsetiletin «laık» sanynan bas tartýdy suraıdy.
Eske sala keteıik, buǵan deıin Eýrokomıssııa Meta-ǵa mıllıardtaǵan eýro aıyppul salýy múmkin ekenin jazdyq.
