Balalarǵa juqqan koronavırýs sırek kezdesetin qandaı sındromdarǵa soqtyrýy múmkin
NUR-SULTAN. QazAqparat – Qazaqstannyń jetekshi ınfektsıonıst dárigeri, medıtsına ǵylymdarynyń doktory Dınagúl Baesheva balalarǵa juqqan koronavırýs sırek kezdesetin qandaı sındromdarǵa soqtyrýy múmkin ekendigin aıtty, dep habarlaıdy QazAqparat tilshisi.
«Qazir qoǵamda ártúrli pikir bar. Solardyń birine qulaq asyp otyrsaq, balalardyń boıynda ımmýnıtet qalyptasý úshin olar koronavırýsty bir ret juqtyryp, jazylýy kerek deıdi. Biraq bul máselege kelgende meniń kózqarasym basqasha. Eger bala koronavırýs juqtyryp alsa onda ol – vırýs juqtyrýshy bolmaq. Ekinshiden frantsýz, ıtalıan jáne amerıkalyq ǵalymdar balalarǵa juqqan koronavırýs «kavasakı» atty sırek kezdesetin sındromǵa ákep soǵýy múmkin ekenin aıtady. Sol úshin balalardyń basyn mundaı qaýipke tigýge bola ma!? Meniń oıymsha, álbette qajet emes», - dedi Dınagúl Baesheva Densaýlyq saqtaý mınıstrliginiń Facebook-tegi parashasyndaǵy onlaın suhbatynda.
Medıtsına mamany sol sebepti balabaqshalardan bastap mektepterde epıdemııaǵa qarsy sharalardy qabyldaý kerektigin aıtyp ótti.
«Balalar qolyn jýyp, antıseptıkti paıdalanýy kerek. Olardy barynsha qashyqtyqta ustaǵan abzal. Tósek oryndary bir-birine tym jaqyn ornalaspaýy tıis. Tósekterdiń arasy kem degende bir metr bolýy tıis. Sonymen qatar balabaqshaǵa kelgen balada koronavırýs bar ma, joq pa – anyqtap otyrý kerek», - dedi ol.
