Balalarǵa jasalatyn kúrdeli otany OQO dárigerleri alǵash ret sheteldik mamandarmen birlesip atqardy
ShYMKENT. QazAqparat - Ońtústik Qazaqstan oblysynda jergilikti dárigerler úshin angıografııalyq ota jasaý múmkindigi týdy, dep habarlaıdy, otyrar.kz.
Oblystyq balalar aýrýhanasynda alǵash ret endovoskýlıarly jolmen qantamyrǵa ota jasaý qolǵa alynyp otyr. Hırýrgtardyń biliktigin arttyrý maqsatynda Izraıl men Garvardtan arnaıy kelgen mamandar sheberlik sabaqtaryn ótkizdi. 1,5 jasar nárestege ota jasaldy. Týa bitti derti bar onyń qoltyq astyndaǵy lımfa tamyrlary úlkeıip, sary sý jınalǵan. Sol isikti kishireıtip, aǵzaǵa keletin qaýipti azaıtý úshin shetelden kelgen dárigerler angıografııalyq apparatty qoldandy.
«Mundaı operatsııa budan buryn eki balaǵa jasalǵan. Olar da sátti aıaqtaldy», deıdi Izraıl men Garvardtan arnaıy shaqyrylǵan professor Belenkı Aleksandr men Ram Býrvın.
Osy operatsııalar negizinde dárigerler sheberlik sabaqtaryn da ótkizdi. Naýqastardyń jaǵdaıyn jergilikti dárigerler baqylaıtyn bolady. Júreginde týa bitti aqaýy bar balalarǵa otany ashyq túrde emes, qan tamyrlary arqyly jasaý ádisi oblystyq balalar aýrýhanasynda alǵash ret qolǵa alyndy. Oǵan múmkindik beretin angıografııalyq apparat 2015 jyly satyp alynǵan bolatyn. Buǵan deıin onymen tek dıagnostıkalyq zertteýler júrgizilgen.
Bıylǵy qyrkúıek aıynan bastap bilimin jetildirip kelgen dárigerler osyndaı jolmen 11 balaǵa ota jasady. Osylaısha, kúrdeli otalardy jasaý endi ózimizde de keńinen qoldanylmaq. Oǵan arnaıy jabdyqtarmen qatar dárigerlerdiń de kásibı múmkindikteri artyp otyr.
