Balalarǵa jańasha bilim beremiz dep ulttyq bolmysty joǵaltyp almaıyq - depýtat Ábdiraıym
ASTANA. QazAqparat - QR Parlament Májilisiniń depýtaty Baqytjan Ábdiraıymnyń oıynsha, bilimniń jańa mazmunyn engizýmen qatar ulttyq tárbıeni umytpaý qajet, dep habarlaıdy QazAqparat tilshisi.
«Qazir elimizdiń bilim berý salasynda jaqsy reformalar iske asyp jatyr. Árıne, elektrondy júıelerdi damytý jolynda adamnyń kim bolyp qalyptasatynyn da esten shyǵarmaý qajet. Bizge jaqsy maman qajet. Oǵan qosa, ol jaqsy adam bolýy kerek. Al jaqsy adam degen kim? Ol - óziniń tilin, dinin qurmetteıtin, salt-dástúrin biletin, qazaq ekenin umytpaıtyn adam. Qazir jappaı aqparattyq texnologııalarǵa úıretemiz dep, bolashaqta sol baladan robot jasap, ony adam retinde joǵaltyp almasaq bolǵany. Ataqty ál-Farabıdiń ózi balanyń biliminen tárbıesi artyq degen bolatyn. Sol sebepten tárbıe máselesin nazardan tys qaldyrmaýymyz qajet», - deıdi Ábdiraıym QazAqparat tilshisine bergen suxbatynda.
Aıta keteıik, bıylǵy Joldaýǵa arnalǵan jıynda «Nazarbaev zııatkerlik mektepteri» AQ basqarma tóraıymy Kúlásh Shámshıdınova«biz bilmeıtin» mamandyqtardy jarııalady.
Onyń sózinshe, búginde reseılikter jańa mamandyqtardyń atlasyn ázirlep qoıdy. Oǵan sáıkes, jaqyn arada molekýlıarly dıetolog, «tiri júıelerdiń» sáýletshisi, kıberprotezderdi ázirleýshi, GMO agronom, energojúıeler dızaıneri, ıntellektýaldy energııa jelileriniń ınjeneri, aqyldy joldardy salýshy, ǵarysh týrızmi boıynsha menedjer, ǵarysh joldarynyń ınjeneri, robottardy basqarýǵa arnalǵan neıroınetrfeısterdi jobalaýshy, zııatkerlik menshikti baǵalaýshy, elektrondy kıim-keshek retsepteriniń jobalaýshysy, oı-órisiniń prodıýsseri jáne taǵy basqa mamandyqtarǵa suranys artady.
