Balalarǵa jańa oryn, jolaýshylarǵa jańarǵan vokzal: óńirlerde ne ózgerdi
ASTANA. KAZINFORM — Qazaqstan óńirlerinde jańa mektepter ashylyp, vokzaldar jańardy, dep habarlaıdy Úkimettiń baspasóz qyzmeti.
Memleket basshysy Qasym-Jomart Toqaevtyń tapsyrmalaryn júzege asyrý aıasynda elimizdiń óńirlerinde kólik jelisin jańǵyrtý, jańa oqýshy oryndaryn ashý jáne mektepke deıingi bilim berýge qoljetimdilikti arttyrý boıynsha júıeli jumys jalǵasyp keledi.
Ótken aptada kólik jáne bilim berý boıynsha paıdalanýǵa berilgen nysandar:
Temirjol ınfraqurylymy
Abaı oblysynda temirjol ınfraqurylymyn jańǵyrtý baǵdarlamasy aıasynda Shar, Úshbıik, Jarma jáne Jalańashkól stansalaryndaǵy jańartylǵan tórt temirjol vokzaly paıdalanýǵa berildi. Nysandar kúrdeli rekonstrýktsııadan ótti. Tozyǵy jetken qurylystar buzylyp, qosymsha qabattar salyndy. Bul keshenderdiń aýmaǵyn keńeıtýge jańa perrondar men platformalar salýǵa, sondaı-aq kútý zaldaryn qaıta jabdyqtap, qozǵalys múmkindigi shekteýli azamattar úshin kedergisiz orta qurýǵa múmkindik berdi.
Aqtóbe oblysynda 1905 jyly salynǵan Jem temirjol vokzaly rekonstrýktsııadan keıin qaıta ashyldy. Keshenniń jalpy aýmaǵy 387,5 sharshy metrden 421,2 sharshy metrge deıin ulǵaıtyldy. Shatyry men qasbeti jańartylyp, ishki bólmeleri qaıta jabdyqtaldy, ınjenerlik jelileri jańǵyrtyldy. Perron rekonstrýktsııalanyp, irgeles aýmaq abattandyryldy. Kútý zaldary jańa jıhazdarmen jáne zamanaýı jabdyqtarmen qamtamasyz etildi.
Bilim berý
Aqtóbe oblysynda oqý jylynyń bastalýyna oraı jeti jańa mektep ashyldy: Aqtóbe qalasynda — úsh, Temir aýdanynda — eki, Muǵaljar jáne Mártók aýdandarynda bir-birden. Ǵımarattar pándik kabınetter, sport zaldary, tsıfrlyq jabdyqtar jáne qaýipsizdik júıelerimen jabdyqtalǵan. Jalpy óńirdiń 449 mektebinde oqý jylyn 194 myńnan astam bala bastady, onyń ishinde 20 myńnan astamy — birinshi synyp oqýshylary.
Almaty oblysynda «Keleshek mektepteri» ulttyq jobasy aıasynda 4,2 myń orynǵa arnalǵan bes jańa mektep ashyldy, taǵy 10 nysan kúrdeli jóndeýden keıin paıdalanýǵa berildi. Bilim berý uıymdary STEM zerthanalary, robototehnıka kabınetteri, sport zaldary jáne qaýipsizdik júıelerimen jabdyqtalyp, kedergisiz orta qalyptastyryldy.
Túrkistan oblysynda toǵyz jańa mektep pen qosymsha ǵımarat paıdalanýǵa berildi. Budan bólek, óńirde kúrdeli jóndeýdi qajet etetin 115 mektepti jańartý jáne jańǵyrtý jumystary júrgizilýde. Túrkistan oblysynda 50 myńnan astam bala birinshi synypqa bardy.
Ulytaý oblysynyń Myńadyr aýylynda Bilim berý ınfraqurylymyn qoldaý qorynyń qarajaty esebinen (zańsyz ıemdenilgen aktıvterdi qaıtarý esebinen) 80 oryndyq jańa mektep ashyldy. Ǵımaratta 18 synyp, robototehnıka kabıneti, sport zaly, sondaı-aq fýtbol jáne basketbol alańdary bar.
Almatyda 120 jáne 160 oryndyq eki jańa balabaqsha ashyldy. Ondaǵy toptardyń árqaısysy ınteraktıvti taqtalar jáne mobıldi tsıfrlyq qurylǵylarmen jabdyqtalǵan. Ǵımarattarda sport jáne mýzyka zaldary, qazaq tili kabınetteri, psıholog kabıneti jáne shyǵarmashylyqpen aınalysýǵa arnalǵan keńistikter qarastyrylǵan.
Buǵan deıin Atyraý oblysynda 12 myń oryndyq 7 jańa mektep paıdalanýǵa berilgenin jazǵanbyz.
