Balalarǵa tólqujat jasaý quny eki ese arzandady

ShYMKENT. KAZINFORM – Ótken jyly Shymkentte balalarǵa 23 myńnan astam tólqujat berildi.

Bıylǵy 1 qańtardan bastap balaǵa tólqujat daıyndaý úshin tólenetin memlekettik baj mólsheri ózgerdi. Eger buryn balalar tólqujatynyń quny 8 AEK-ti qurasa, qazir eki ese az tóleıdi. Endi ony daıyndaý úshin ata-analar 4 AEK nemese 14 768 teńge tóleıdi.

«Qazaqstandyqtar jeke kýálikti 16 jastan bastap alatyn bolsa, tólqujatty kez kelgen jasta alýǵa bolady. Bul qujatty rásimdeý úshin mindetti túrde HQKO-ǵa júginý qajet. Balanyń tólqujatyn rásimdeý kezinde onyń týý týraly kýáligin, ata-anasynyń biriniń jeke kýáligin jáne baj salyǵyn tóleý týraly túbirtekti usyný kerek», - dep túsindirdi «Azamattarǵa arnalǵan úkimettiń» Shymkent qalasy boıynsha fılıalynyń PR-menedjeri Altynaı Tataeva.

Bul rette qyzmetke ótinish bildirý úshin balanyń ata-anasynyń biri kelýi mindetti. Qyzmet kórsetýdiń standartty merzimi – 15 jumys kúni. Alaıda, qosymsha tólem jasaý arqyly bul protsesti jedeldetýge bolady. Shymkent turǵyndary protsesti osy ádis boıynsha úsh kúnnen bir jumys kúnine deıin qysqarta alady.

Aıta keteıik, 2023 jyly shymkenttik jas turǵyndarǵa 23 myńnan astam tólqujat berildi.