Balalarǵa syılyq taratyp júrgen «Santa-Klaýsqa» oq atyldy
ASTANA. 27 jeltoqsan. QazAqparat - Qatarynan jeti jyl boıy balalarǵa Rojdestvo qarsańynda Santa-Klaýs kıiminde syılyq taratatyn afroamerıkandyq Ksaver Hokınske bıylǵy jyly syılyqtaryn taratýdy bastamaı jatyp-aq oq atyldy.
Vashıngtonnyń ońtústik-shyǵysyndaǵy Barrı-Fram aýdanynda az qamtylǵan otbasylarda 800-ge jýyq bala turady. Ol AQSh-tyń teńiz jaıaý áskeriniń qaıyrymdylyq qory arnaıy satyp alǵan 1800 oıynshyqty osyndaǵy búldirshinderdiń qolyna tapsyrýy kerek bolatyn.
The Washington Post jazýynsha, atalǵan oqıǵanyń kýágerleri qarýdyń atylǵan dybysyn estigen. Birde-bir syılyq taratyp úlgermegen Santa-Klaýs ıyǵynan aýyr jaraqat alǵan. Boljam boıynsha, buzaqy Stıvens-roýd kóshesiniń boıyndaǵy jaqyn ornalasqan ǵımarattyń terezesinen oq atqan. Japa shekken azamat óziniń jeti jylǵy jumysynda birinshi ret osyndaı buzaqylyqpen tap bolyp otyrǵandyǵyn aıtady. Dárigerler pnevmatıkalyq qarýdan atylǵan oqty er adamnyń ıyǵynan alyp tastady.
