Balalarǵa sapaly medıtsınalyq kómek kórsetilýi tıis - Álnazarova
ASTANA. KAZINFORM – Astanada QR Densaýlyq saqtaý mınıstrligi, Týrızm jáne sport mınıstrligi jáne Ulttyq kásipkerler palatasynyń qoldaýymen «Capital Health» tuńǵysh ulttyq forýmy ótip jatyr.
Іs-sharanyń basty maqsaty – memleket, bıznes jáne ǵylymnyń toǵysýy sheńberinde salaýatty bolashaqty nasıhattaý, ult saýlyǵyn ulyqtaý.
Forýmdy ashqan Densaýlyq saqtaý mınıstri Aqmaral Álnazarova sońǵy 10 jylda Qazaqstanda halyq sanynyń jyl saıynǵy turaqty ósimi baıqalatynyn atap ótti.
«Búginde úkimet balalardyń densaýlyǵyna erekshe mán berip, zamanaýı jáne tıimdi densaýlyq saqtaý júıesin qurýǵa umtylýda. Biz árbir bala myqty, deni saý jáne baqytty bolyp ósýi úshin olardyń sapaly medıtsınalyq kómek pen kútimge qol jetkizýin qamtamasyz etýge mindettimiz. Óıtkeni balalar – bizdiń bolashaǵymyzdyń negizi», - dedi mınıstr.
Onyń aıtýynsha, 2030 jylǵa qaraı juqpaly emes aýrýlardan bolatyn mezgilsiz ólim-jitimdi úshten birge qysqartý kózdelip otyr.
«Osy maqsatta turaqty damý maqsattary ındıkatorlary densaýlyq saqtaý júıesiniń baǵdarlamalyq qujattarynda júzege asyrylýda. Halyqaralyq uıymdarmen birlesip, halyqtyń densaýlyǵy men ál-aýqatyn qoldaý maqsatynda Jol kartasy ázirlendi. Sonymen qatar, ár adamnyń densaýlyǵy óz qolynda jáne ómir saltyna, minez-qulyq faktorlaryna baılanysty ekenin halyqqa uǵyndyrýymyz mańyzdy», - dedi Aqmaral Álnazarova.
