Rekord: Astana áýejaıy 7,5 mıllıonynshy jolaýshysyn qarsy aldy
Astana halyqaralyq áýejaıy 7 jarym mıllıonynshy jolaýshyǵa qyzmet kórsetti. Bul – Astana áýejaıy úshin rekordtyq kórsetkish, dep habarlaıdy Kazinform.
Kólik mınıstrliginiń málimetinshe, elorda áýejaıynyń 7 jarym mıllıonynshy jolaýshysy KC853 reısimen Almaty-Astana baǵytymen ushyp kelgen Seıitqazıevter otbasy boldy.
«Biz Almatydaǵy týystarymyzǵa baryp, qonaq bolyp, úıimizge kele jatyrmyz. Biraq reısten bizdi áýejaıdyń basshylyǵynyń ózi kútip alyp, erekshe qonaq bolamyz dep múlde oılaǵan joqpyz. Qazirdiń ózinde tańdanysymyzdy jasyra almaı turmyn. Munyń bári ulym Mansurdyń nesibesi shyǵar dep oılaımyn. Osylaı jyly qarsy alǵandaryńyz úshin myń raqmet!», - dedi Seıitqazıevter otbasynyń otaǵasy Baýyrjan.
«Astana halyqaralyq áýejaıy jyldan-jylǵa álemdik avıatsııalyq qoǵamdastyqta óziniń tanymaldyǵy men mańyzdylyǵyn dáleldep kele jatyr. 2023 jyly Astana halyqaralyq áýejaıynan Ázerbaıjan áýekompanııalary, RedSea, AirCairo, MaviGok áýekompanııalary turaqty reıster oryndaı bastady. Búgin áýejaıymyzdyń tarıhynda jańa rekord ornady. Byltyr 6 mıllıon jolaýshy qabyldasaq, bıyl kórsetkish 25 paıyzǵa artyp, elorda áýejaıy 7 jarym mıllıonynshy jolaýshyǵa qyzmet kórsetip jatyr», - dedi áýejaıdyń basqarama tóraǵasy Erǵazy Joldasov.
Qarashada Astana halyqaralyq áýejaıy Terminals Holding kompanııasymen birlesken jumysty bastady. Investor elorda áýejaıyndaǵy ushý qoný jolaǵyn kúrdeli jóndeýden ótkizýdi jáne jolaýshylarǵa qyzmet kórsetý sapasyn arttyrýdy josparlap otyr. Nátıjesinde jolaýshylar aǵynyn 2 ese kóbeıtip, 14 mıllıonǵa jetkizý kózdelip otyr.
Astana áýejaıynan táýligen orta eseppen 200-den asa reıs oryndalady. 11 aıdyń kórsetkishi boıynsha jyl basynan 30 myń reıs oryndalǵan.
