Balalarǵa sabaq 30 mınýt qana ótken: Jambylda 204 erekshe balanyń quqyǵy qorǵaldy
ASTANA. KAZINFORM — Merki aýdanynyń prokýratýrasy «Psıhologııalyq-pedagogıkalyq túzetý kabıneti» KMM-niń (PPTK) qyzmetinde kámeletke tolmaǵandardyń quqyqtarynyń saqtalý jaǵdaıyna taldaý júrgizdi.
Taldaý nátıjesinde PPTK-ǵa baratyn 204 kámeletke tolmaǵan balaǵa túzetý kómegin uıymdastyrý barysynda qoldanystaǵy zańnama talaptarynyń buzylǵany anyqtaldy.
Atap aıtqanda, belgilengen normatıvtik talaptarǵa sáıkes balanyń jasyna qaraı túzetý sabaqtarynyń uzaqtyǵy 35-ten 45 mınýtqa deıin bolýy tıis. Alaıda, bekitilgen sabaq kestesine sáıkes PPTK mamandary ótkizgen sabaqtardyń uzaqtyǵy 30 mınýtty ǵana quraǵan.
Sonymen qatar, bilim alýshylardyń jeke damytý baǵdarlamalarynda kózdelgen saǵat kólemi mamandardyń qorytyndylary men usynymdary eskerilmesten josparlanǵany anyqtaldy.
Sondaı-aq, jeke damytý baǵdarlamalary, túzetý sabaqtarynyń kestesi jáne ótkizilgen saǵattardy esepke alý jýrnaldary arasynda sáıkessizdikter anyqtaldy.
— Prokýratýranyń qadaǵalaý aktisi boıynsha balalardyń túzetý sabaqtarynyń kestesi men jeke damytý baǵdarlamalary zań talaptaryna sáıkestendirildi. Budan bólek, anyqtalǵan zań buzýshylyqtarǵa jol bergeni úshin atalǵan mekemeniń 15 qyzmetkeri tártiptik jaýaptylyqqa tartyldy, — delingen vedomstvo taratqan aqparatta.
Osyǵan deıin Prezıdent ár oblysta erekshe qajettiligi bar balalardy qoldaý ortalyǵyn salýdy tapsyrdy.
