Balalarǵa protezdik-ortopedııalyq buıymdar tegin beriledi
ASTANA. KAZINFORM- Qazaqstanda protezdik-ortopedııalyq kómekke muqtaj balalarǵa medıtsınalyq kórsetilimderine sáıkes jeke ólshemmen jasalǵan protezdik-ortopedııalyq buıymdar tegin beriledi. Bul jumys áleýmettik qorǵaý júıesindegi mańyzdy baǵyttardyń biri.
Kómek QR Eńbek jáne halyqty áleýmettik qorǵaý mınıstrliginiń Áleýmettik qorǵaý salasyn damytýdyń ulttyq ǵylymı ortalyǵy bazasynda kórsetiledi, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
Protezdik-ortopedııalyq kómek tirek-qımyl júıesinde buzylystary bar balalardyń qozǵalysyn qoldaýǵa, dene bólikteriniń qyzmetin túzetýge jáne ońaltýdyń nátıjesin jaqsartýǵa baǵyttalǵan. Munda basty nazar ár balaǵa jeke qaraýǵa aýdarylady. ıAǵnı buıym balanyń densaýlyǵyna, dene bitiminiń erekshelikterine jáne naqty qajettiligine qaraı tańdalyp, jeke ólshemimen daıyndalady.
Protezdik-ortopedııalyq kómektiń negizgi túrleriniń biri – ortezdeý. Ortez – deneniń belgili bir bóligin ustap turýǵa, turaqtandyrýǵa nemese durys qalypqa keltirýge kómektesetin arnaıy medıtsınalyq buıym. Ol sondaı-aq denege túsetin salmaqty azaıtýǵa kómektesedi.
Balanyń medıtsınalyq kórsetilimine qaraı tabanǵa, tobyqqa, tize býynyna, baltyrǵa, aıaqtyń tolyq bóligine, sondaı-aq qoldarǵa arnalǵan ortezder jasalýy múmkin. Balaǵa qandaı ortez qajet ekenin maman tekserý nátıjesine qaraı anyqtaıdy.
Ortez balanyń jeke ólshemi boıynsha jasalady. Bul balalar úshin óte mańyzdy, sebebi bala ósken saıyn dene bitimi men qozǵalysqa degen qajettiligi de ózgeredi. Sondyqtan mamandardyń mindeti daıyn buıymdy bere salý emes, balanyń dene ereksheligine sáıkes keletin ortez daıyndaý. Durys tańdalǵan ortez balanyń qozǵalysyn qoldap, ońaltý sharalarynyń tıimdi ótýine kómektesedi.
Ortezdi balanyń jasyna, sýretine nemese syrtqy belgilerine qarap óz betinshe tańdaýǵa bolmaıdy. Aldymen mamanǵa qaralý qajet. Maman balanyń densaýlyǵyn, qozǵalý múmkindigin baǵalap, ortezdiń qajet-qajet emestigin anyqtaıdy. Sodan keıin qajetti buıymnyń túri tańdalyp, balanyń jeke ólshemderi alynady. Osy ólshemder boıynsha ortez daıyndalady.
Protezdik-ortopedııalyq kómek alýǵa quqyǵy bar azamattarǵa jeke ólshemmen jasalatyn buıymdar medıtsınalyq kórsetilimderge jáne belgilengen tártipke sáıkes tegin beriledi. Bul otbasylarǵa qajetti buıymdy qosymsha shyǵynsyz alýǵa múmkindik beredi.
Budan bólek, eger protezdik-ortopedııalyq kómek alý úshin basqa eldi mekenge barý qajet bolsa, jol shyǵyndaryn óteý qarastyrylǵan. Jol shyǵyndary jylyna eki retten artyq ótelmeıdi. Al usaq protezdik-ortopedııalyq quraldardy alý kezinde jol shyǵyny bir ret óteledi. Sondaı-aq balanyń protezdik-ortopedııalyq kómek alýyna baılanysty ony alyp barǵan adamnyń jol shyǵyny da bir ret óteledi.
Osylaısha, memlekettik qoldaý balanyń qajettiligin anyqtaýdan bastap, mamannyń keńesi, jeke ólshem alý, buıymdy daıyndaý jáne qajet bolǵan jaǵdaıda kómek kórsetiletin jerge barý shyǵyndaryn óteýge deıingi protsesti qamtıdy.
-QR Eńbek jáne halyqty áleýmettik qorǵaý mınıstrligi ata-analarǵa: eger balaǵa ortez nemese basqa da protezdik-ortopedııalyq buıym qajet bolsa, eń aldymen mamanǵa júginýge keńes beredi. Balaǵa durys tańdalyp, jeke ólshemimen jasalǵan buıym onyń qozǵalysyn saqtaýǵa, kúndelikti ómirde ózdiginen áreket etýine jáne ońaltý nátıjesin jaqsartýǵa kómektesedi, -delingen habarlamada.
Osyǵan deıin travmatologııalyq jáne ortopedııalyq kómek kórsetý standarty jańartylǵany týraly jazdyq.
