Balalarǵa pallıatıvtik medıtsınalyq kómek kórsetý standarty bekitildi
ASTANA. KAZINFORM — Densaýlyq saqtaý mınıstrligi Ombýdsmenniń usynymdaryn qabyldap, balalarǵa pallıatıvtik medıtsınalyq kómek kórsetý standartyn bekitti. Bul týraly DSM baspasóz qyzmeti habarlady.
Densaýlyq saqtaý mınıstriniń buıryǵymen Qazaqstan Respýblıkasynda balalarǵa pallıatıvtik medıtsınalyq kómek kórsetýdi uıymdastyrý standarty bekitildi.
Balalarǵa sapaly pallıatıvtik kómektiń qoljetimdiligin jetildirý jáne keńeıtý qajettiligi Densaýlyq saqtaý mınıstrligine 2024 jyldyń qazan aıynda Ombýdsmenniń arnaıy usynysynda belgilengen bolatyn.
— Pallıatıvtik kómek emdelmeıtin aýrýǵa shaldyqqan balalardyń azaptaryn jeńildetip, ómir súrý sapasyn jaqsartyp qana qoımaıdy, sonymen qatar árbir adamnyń laıyqty ómir súrýge jáne adamdyq qadir-qasıetiniń qurmettelýine degen irgeli quqyǵy bolyp tabylady, bul Qazaqstan ratıfıkatsııalaǵan negizgi halyqaralyq qujattarda, sonyń ishinde Bala quqyqtary týraly konventsııada bekitilgen, — delingen DSM habarlamasynda.
Árbir bala densaýlyq jaǵdaıyna qaramastan, onyń jeke qajettilikterine sáıkes keletin medıtsınalyq kómekke qol jetkizýge quqyly. Al pallıatıvtik kómek jaǵdaıynda medıtsınalyq qamtamasyz etý quqyǵy balaǵa da, onyń otbasyna da fızıkalyq ǵana emes, emotsıonaldyq sıpattaǵy qoldaý kórsetýdi bildiredi.
Aıta ketelik keler jyldan bastap medıtsınalyq kómek paketteri qalaı ózgeretini týraly jazǵan edik.