Balalarǵa otandyq fılmder tegin kórsetilip jatyr

NUR-SULTAN. QazAqparat – Astanada balalarǵa otandyq kartınalar men anımatsııalyq fılmder tegin kórsetilip jatyr, dep habarlaıdy QazAqparat.

«Qazaqfılm» AQ, «Ulttyq kınony qoldaý memlekettik ortalyǵy» KEAQ jáne Roza Baǵlanova atyndaǵy «Qazaqkontsert» memlekettik kontserttik uıymy Balalar jyly aıasynda «Jazǵy kıno» jobasyn júzege asyryp jatyr. Onyń aıasynda elimizdiń kez kelgen óńirinde turatyn balalar «Qazaqstan» ortalyq kontsert zalynda ótetin kınokórsetilimderdi tegin tamashalaıdy.

«Qazaqkontserttiń» baspasóz qyzmetinen málim etkendeı, joba maqsaty – balalardy mádenı qundylyqtarmen tanystyrý, olardyń ishki álemin baıytý.

Maýsym aıy bastalǵaly 4 myńnan astam bala otandyq úzdik mýltfılmder men kórkem fılmderdi kórip úlgerdi.

Kórermenge qazaqstandyq jańa kınofılmder men anımatsııalyq fılmder usynylady.

Aldaǵy kúnder ańdatpasy:

- 24 maýsym kúni saǵat 15:00 jáne 19:00-de «Nartaı» fılmi;

- 25 maýsym kúni saǵat 12:00 jáne 18:00-de «Uly dala tańy» fılmi;

- 27 maýsym kúni saǵat 12:00 jáne 19: 00-de «Paralımpıadashy» fılmi

Kınokórsetilimge 8 708 888 19 91 telefony boıynsha jazylýǵa bolady.