Balalarǵa nevrologııalyq kómek kórsetýdiń jańa standarty ázirlendi
ASTANA. KAZINFORM — Densaýlyq saqtaý mınıstrligi balalarǵa nevrologııalyq kómek kórsetýdi uıymdastyrýdyń jańa standart jobasyn ázirledi.
Qujat medıtsınalyq uıymdardyń menshik nysanyna qaramastan, emhanalarda, aýrýhanalarda jáne kúndizgi statsıonarlarda balalarǵa nevrologııalyq kómek kórsetýdiń biryńǵaı talaptaryn kózdeıdi. Negizgi qaǵıdat — balanyń dárigerge alǵash júginýinen jáne dıagnostıkadan bastap mamandandyrylǵan emdeýge, dınamıkalyq baqylaýǵa jáne ońaltýǵa deıingi kezeńderde medıtsınalyq kómektiń úzdiksizdigin qamtamasyz etý.
— Nevrologııalyq buzylystardy erte anyqtaýǵa erekshe nazar aýdarylady. Ýaqtyly dıagnostıka júrgizý jáne durys tańdalǵan emdeý tásilderi asqynýlardyń damý qaýpin tómendetýge jáne balanyń odan ári damýyna qolaıly jaǵdaı jasaýǵa múmkindik beredi. Jańa standart sondaı-aq emhanalar, statsıonarlar jáne ońaltý qyzmetteri arasyndaǵy ózara is-qımyldy jaqsartýǵa baǵyttalǵan. Bul balanyń emdeýdiń árbir kezeńinde qajetti medıtsınalyq kómekti júıeli ári sabaqtastyqpen alýyn qamtamasyz etýge múmkindik beredi, — dep atap ótedi mınıstrlikten.
Vedomstvonyń atap ótýinshe, ata-analar úshin bul medıtsınalyq kómek alý tártibin túsinikti etýge, sondaı-aq emdeý jáne qalpyna keltirý protsesin neǵurlym uıymdasqan ári júıeli túrde júrgizýge yqpal etedi. Joba balalardyń densaýlyǵyn saqtaý júıesin jetildirý jónindegi 2026–2030 jyldarǵa arnalǵan «Bastaý-2030» jospary aıasynda ázirlendi.
— Árbir balanyń densaýlyǵyn saqtaý, aýrýlardy ýaqtyly anyqtaý jáne turǵylyqty jerine qaramastan qoljetimdi medıtsınalyq kómekpen qamtamasyz etý basty basymdyq bolyp qala beredi, — delingen Densaýlyq saqtaý mınıstrliginiń túsindirme jazbasynda.
Ashyq NQA portalynda jarııalanǵan standart jobasy 5 qarashaǵa deıin qoǵamdyq talqylaýǵa shyǵarylǵan.
Bıyl maýsymda Densaýlyq saqtaý mınıstrligi árbir bala men onyń otbasyna «bir tereze» qaǵıdaty boıynsha erte kómek kórsetýdiń qoljetimdiligin qamtamasyz etý maqsatynda 32 aýdandyq aýrýhananyń bazasynda pılottyq jobany iske qosatynyn habarlaǵan edi.
