Balalarǵa qysym kórsetýge bolmaıdy - QR BǴM mınıstri Aslan Sárinjipov
ASTANA. QazAqparat - Balalarǵa qysym kórsetýge bolmaıdy. Bul týraly búgin Almatyda ótken brıfıng barysynda QR BǴM mınıstri Aslan Sárinjipov aıtyp, mınıstrlikten keshirim suraǵan oqýshy týraly óz pikirin jetkizdi.
"Balalarǵa qysym kórsetýge bolmaıdy. Alaıda óz qatesin túsinip, keshirim suraýdy durys dep sanaımyn. Birinshi kezekte ótirik aıtýdan alys bolý kerek", - dedi ol.
Atalǵan máseleniń búkil respýblıkaǵa jarııa bolýyn mınıstr mekemeniń baspasóz qyzmetiniń jibergen qateligi dep túsindirdi.
"Jýrnalısterden de balalarǵa qatysty aqparatty taratýda abaı bolýlaryn suraımyn. Sıýjet daıyndaǵanda másele psıhıkasy názik balalar týraly bolyp jatqanyn umytpaý kerek", - dedi mınıstr.
Aıta keteıik, Bilim jáne ǵylym mınıstrliginiń saıty petropavldyq túlek Aınur Seriktiń Aslan Sárinjipovtan keshirim surap jazǵan hatyn jarııalaǵan bolatyn.
Hatta Ábý Dosmuhambetov atyndaǵy oblystyq daryndy balalarǵa arnalǵan gımnazııa-ınternatynyń túlegi Aınur Serik 31 arnaǵa bergen jalǵan aqparaty úshin keshirim suraǵan. Bıylǵy jylǵy UBT tapsyrmalarynyń barlyǵynyń mektep baǵdarlamasyna saı keletindigin, barlyq suraqtardyń durys jaýabynyń bolǵanyn, durys qurylmaǵan suraqtyń bolmaǵanyn jetkizgen.
Esterińizge salsaq, budan buryn 31 arnaǵa bergen suhbatynda Aınur Petropavlda suraqtardyń durys bolmaǵany sebepti kóptegen túlekter «Altyn belgini» aqtaı almasa, keıbiri 50 balldyq mejege de jetpegenin aıtqan bolatyn.
