Balalarǵa qol jumsaǵan din qyzmetkeri jumystan shyǵaryldy – Múftııat
Áleýmettik jelide mektep jasyndaǵy kishkentaı eki balanyń dene jaraqatyn alǵan vıdeosy tarap, oqyrmandar tarapynan túsinbeýshilik týyndaýda. Keıbir oqyrmandar bul oqıǵa medresede bolǵan degen pikir jazýda. Qazaqstan musylmandary dinı basqarmasy oqıǵanyń anyq-qanyǵyna kóz jetkizdi.
«Oqıǵa Shymkent qalasynda bolǵan. Túrkistan oblysy Saryaǵash aýdanynyń turǵyndary – aǵaly-inili Seıitqoja, Esenqoja Eshmuratovtar óz uldary Batyrhan men Álıhanǵa synyptasy – «Taspaý Sálimbaı» meshitiniń ustazy Rústem Asqarovqa úı jaǵdaıynda dinı sabaq berýdi ótinedi.
Ókinishke qaraı «Taspaý Sálimbaı» meshitiniń ustazy Rústem Asqarov ózge turmystyq máseleler boıynsha ashýlanyp, óz emotsııasyn tizgindeı almaı, kámeletke tolmaǵan balalarǵa qol jumsaǵan.
Birinshiden, bul oqıǵa medresede bolmaǵan. Ekinshiden, «Quran súrelerin durys oqymaǵany úshin balalardy urdy» degen pikir shyndyqqa janaspaıdy. Osy rette oqyrmandardan máseleniń anyq-qanyǵyna kóz jetkizbeı turyp aldyn-ala boljam aıtýǵa asyqpaýdy suraımyz», - dep jazdy A. Qonarbaıuly Facebook jelisinde.
«Taspaý Sálimbaı» meshitiniń ustazy Rústem Asqarov kámeletke tolmaǵan balalardy úı jaǵdaıynda oqytyp, olarǵa qol jumsap, din qyzmetkeriniń etıkasyn (musylmandyq, ustazdyq ádepti saqtamaý, ózgelerge zııan tıgizý t.b.) qatań buzǵan.
«Qazaqstan musylmandary dinı basqarmasy bul oqıǵadan tıisti qorytyndy shyǵardy jáne óreskel áreketke jol bergen din qyzmetkerlerine shara qoldandy. Búgin, 2023 jyldyń 15 maýsymynda Rústem Asqarov Bas múftı buıryǵymen «Taspaý Sálimbaı» meshitiniń ustazy qyzmetinen bosatyldy.
Qazir bul máselemen quqyq qorǵaý organdary aınalysýda», - dedi múftııattyń baspasóz hatshysy.
