Balalarǵa qyzmet kórsetetin nysandarda tekseris jıileıdi — DSM
ASTANA. KAZINFORM — Qazaqstanda balalarǵa qyzmet kórsetetin uıymdarda sanıtarııalyq baqylaý kúsheıtiledi. Memleket basshysy qol qoıǵan jańa zań joǵary táýekeldi nysandardy jylyna eki ret tekserýge múmkindik beredi.
QR DSM Sanıtarııalyq-epıdemıologııalyq baqylaý komıtetiniń bas sarapshysy Aınur Almaǵambet balalardyń qaýipsizdigin qamtamasyz etýge baǵyttalǵan jańa zań normalaryn túsindirdi.
— Bul qujat sanıtarııalyq-epıdemıologııalyq salasyndaǵy qadaǵalaýdy kúsheıtýge baǵyttalǵan. Bul — balalardyń qaýipsizdigin nyǵaıtýǵa jáne aldyńǵy jyly tirkelgen rezonanstyq ýlaný jaǵdaılaryn boldyrmaýǵa arnalǵan bastama, — dedi Aınur Almaǵambet Jibek Joly telearnasyndaǵy «Bugin LIVE» baǵdarlamasynda.
Jańa normalarǵa sáıkes, joǵary táýekel deńgeıindegi nysandar keminde alty aıda bir ret, al tómen táýekeldi nysandar jylyna bir ret josparly tekserýden ótedi. Buǵan mektepter, balabaqshalar, ınternattar, aýrýhanalar, sport keshenderi jáne balalarǵa qyzmet kórsetetin barlyq memlekettik uıymdar kiredi.
Sarapshynyń aıtýynsha, jańa zańnyń mańyzdy artyqshylyǵy — alǵashqy tekserýde aıyppul salynbaıdy. Aldymen nusqama berilip, kemshilikterdi túzetýge múmkindik jasalady. Eger kásipkerlik nysan nusqamany oryndamasa ǵana aıyppul taǵaıyndalady.
— Sondaı-aq buryn tekserý týraly aldyn ala habarlaıtyn edik, endi kez kelgen ýaqytta baryp teksere alamyz. Bul nysandardaǵy shynaıy ahýaldy kórýge múmkindik beredi, — dedi komıtet ókili.
Zańda qarjylyq sebepterge baılanysty týyndaǵan buzýshylyqtarǵa qatysty da ózgerister qarastyrylǵan. Mysaly, jóndeý jumystary júrgizilmegen nemese ǵımarattyń tozýyna baılanysty týyndaǵan kemshilikter úshin mektep nemese aýrýhana basshylaryna aıyppul salynbaıdy. Mundaı jaǵdaılarda usynys tikeleı qarjy bóletin ákimdikke nemese bilim berý basqarmasyna joldanady.
Sarapshy bul ózgerister balalardyń quqyqtary men densaýlyǵyn qorǵaýdy kúsheıtip, buzýshylyqtardyń aldyn alýǵa múmkindik beredi dep atap ótti. Almaǵambet jańa normalardyń tıimdiligi alǵashqy aılardyń ózinde baıqalady dep senedi.
Aıta keteıik, 4 jeltoqsanda Memleket basshysy «Qazaqstan Respýblıkasynyń keıbir zańnamalyq aktilerine mádenıet, bilim, otbasy jáne memlekettik baqylaý máseleleri boıynsha ózgerister men tolyqtyrýlar engizý týraly» Zańǵa qol qoıǵanyn jazǵan edik. Bul zań 2026 jyldyń 1 aqpannan bastap kúshine enedi.