Balalarǵa qatysty qylmystardyń sany 3,5 ese azaıdy
ASTANA. QazAqparat - Balalarǵa qatysty qylmystardyń sany 3,5 ese azaıdy. Bul týraly búgin Ortalyq kommýnıkatsııalar qyzmetinde ótken baspasóz máslıhatynda QR ІІM Ákimshilik polıtsııa komıtetiniń bólim basshysy Áset Ospanov málim etti, dep habarlaıdy QazAqparat.
«Sońǵy 5 jylda kámeletke tolmaǵan balalarǵa qatysty qylmystardyń sany 3,5 ese azaıǵan. 2012 jyly 8,8 myń qylmys tirkelse, byltyr 2,5 myń qylmys jasalǵan. Qoǵam arasynda balalarǵa qatysty qylmys pen zorlyq-zombylyq artty degen pikir qalyptasqan. Alaıda ol olaı emes. Qoǵam aqparattyq ortaǵa belsendi aralasa bastady. Qazir árbir adamda, balada, tipti qart kisilerde smartfon bar. Bir qylmys jasalsa, barlyǵy áleýmettik jelige ornalastyryp, qyzý talqyǵa salady. Sonyń áserinen qoǵamda kúnnen kúnge balalarǵa qatysty qylmystar artyp ketkendeı kórinedi», - dep atap ótti Á. Ospanov.
Onyń aıtýynsha, sonymen qatar jasóspirimder jasaıtyn aýyr jáne asa aýyr qylmystar sany da edáýir azaıǵan. Sońǵy 5 jylda jasóspirimdermen jasalatyn qylmystar sany jylyna ortasha eseppen 6 protsentke azaıyp keldi. 2012 jyly 4,6 myń bala tártip buzsa, 2016 jyly ol qylmystardyń sany 3 myń boldy.
«Jaz mezgilinde biz «Jumyspen qamtý» sharasyn ótkizýdi kózdep otyrmyz. Onyń aıasynda ishki ister organdarynyń esebinde turǵan balalardy bos ýaqytynda belgili bir jumyspen aınalysýǵa jiberemiz. Sonymen qatar «Túngi qaladaǵy balalar» atty aktsııa uıymdastyramyz. Bul sharalardyń arqasynda jastar arasyndaǵy qylmys sanyn taǵy da azaıtyp, jasóspirimderge qatysty jasalatyn zań buzýshylyqtardyń aldyn alamyz», - dep túıdi sózin ІІM ókili.
