Úkimet balaǵa zorlyq-zombylyq kórsetkenderge jazany kúsheıtý jobasyn maquldady - Dınara Zákıeva
ASTANA. KAZINFORM – Úkimette Memleket basshysynyń tapsyrmasymen ázirlengen áıelder quqyqtary men balalardyń qaýipsizdigin qamtamasyz etý týraly zań jobasyn tanystyrý aıaqtaldy. Bul týraly Qazaqstan Respýblıkasyndaǵy Bala quqyqtary jónindegi ýákil Dınara Zákıeva aıtty.
«Balalarǵa qatysty zorlyq-zombylyq úshin jazany qatańdatý, sondaı-aq otbasylar men balalarǵa kómek kórsetý ınfraqurylymyn qurý jónindegi barlyq túzetý Úkimet qorytyndysynda qoldaý tapty. Budan ári olar Májiliste talqylanatyn bolady.
Úkimettiń qorytyndysy – zań jobasymen jumys isteýdiń mańyzdy jáne kóp ýaqyt alatyn bólikteriniń biri. (Oń qorytyndy shyqpasa, is júzinde norma qabyldanbaıdy). Sondyqtan keıingi birneshe aı boıy, demalys kúnderinde de PA, Premer-Mınıstr Keńsesi, Ádiletmıni, BP, ІІM, Eńbekmıni, EHÁQM-indegi áriptesterimmen normany usynylǵan túrde qoldaý jáne ol quqyq qoldanýda tıimdi bolýy úshin baptardyń redaktsııalarymen jumys istedik», - dedi Bala quqyqtary jónindegi ýákil.
Ol qyrkúıekte AMANAT-tyń Májilistegi fraktsııasynda jáne BP-da tanystyrǵan balalar qaýipsizdigi máseleleri boıynsha engizilgen 40-tan astam túzetý úkimetten qoldaý taptqanyn jazdy.
Atap aıtqanda:
* balalarǵa qatysty zorlyq-zombylyq úshin tatýlasý múmkindigin alyp tastaý jáne jazany qatańdatý: azaptaý (baptyń jańa redaktsııasy), qatygezdik, densaýlyqqa aýyr, ortasha zııan keltirý, kámeletke tolmaǵandy urlaý jáne zańsyz bas bostandyǵynan aıyrý úshin;
* zorlyq-zombylyqty krımınalızatsııalaý, ıaǵnı, balalarǵa qatysty uryp-soǵý jáne densaýlyqqa jeńil zııan keltirý úshin qylmystyq jaýapkershilik engizý (zań jobasy aıasynda eresekterge de qatysty); bala zorlaý úshin bas bostandyǵynan ómir boıyna aıyrý;
* balaǵa jynystyq sıpatta tıisýge qatysty bap engizý;
* balaǵa qatysty zorlyq-zombylyqqa baılanysty qylmystar boıynsha tergeý áreketteri kezinde qamaýda ustaý;
* balalarǵa qyzmet kórsetetin uıymdardy lıtsenzııalaýdy engizý (MÁM, lagerler);balany avtobýstan májbúrli túrde túsirip tastaý úshin;
* býllıng úshin jaýapkershilik engizý;
* Profılaktıkaǵa qatysty: otbasylarǵa, balalarǵa kómek kórsetý ınfraqurylymyn qurý (Otbasyn qoldaý ortalyqtaryn, Balalardy psıhologııalyq qoldaý ortalyqtaryn ashý);
* qıyn ómirlik jaǵdaıdaǵy otbasylarǵa kómek kórsetýdi uıymdastyrý quzyretin bekitý; agressormen psıhologııalyq jumys (QK-ke erekshe talaptar ınstıtýtyn engizý aıasynda);
* zorlyq-zombylyqqa, býllıngke ushyraǵan balalarǵa kómek kórsetý baǵdarlamalaryn ázirleý quzyretin engizý.
Dınara Zákıeva zań jobasy, ásirese áıelder quqyǵyn qamtamasyz etýge baılanysty mańyzdy tolyqtyrýlarmen birge AMANAT fraktsııasynyń depýtattary Ashat Aımaǵambetov, Elnur Beısenbaevtyń bastamalary aıasynda qazan aıynda Úkimettiń qorytyndysyna baǵyttalǵanyn atap ótti.
«Úkimet qorytyndysy boıynsha birlesken jumys úshin Úkimet basshylyǵy, Bas prokýratýra, ІІM, memlekettik organdarǵa, Adam quqyqtary jónindegi ýákil A.E. Lastaev, Janysova M.K., professorlar I.Sh. Borchıshvılı men M.Sh. Qoǵamov, Janna Ahmetova, Anna men Olga Ryldarǵa, sondaı-aq ár túzetýdi tipti demalys kúnderi men keıde túngi ýaqytta da talqylap, kún saıyn jumys istegen memlekettik organdardyń qyzmetkerleri Faına Ibragımova, Bekbolat Birnazarov, Juldyz Baımasheva, ıÝlııa Ovechkına, Rınat Zýlhaırovqa alǵys aıtamyn», - dedi ol.
