Balalarǵa qatysty zorlyq derekterine áreket etýdiń naqty merzimi bekitildi
ASTANA. KAZINFORM – Elimizde balalarǵa qatysty zorlyq-zombylyq, qatygezdik pen jábirleý derekterine der kezinde áreket etýdiń biryńǵaı vedomstvoaralyq algorıtmi bekitildi. Atalǵan birlesken buıryq «Quqyq buzýshylyq profılaktıkasy týraly» Zańdy iske asyrý aıasynda qabyldandy.
Qujatta alǵash ret polıtsııa, bilim berý uıymdary, medıtsına qyzmetkerleri men qorǵanshylyq organdarynyń jaýapkershilik aıasy naqty bólingen. Endi bala quqyǵynyń buzylýy týraly kez kelgen aqparat belgilengen merzimder men jaýapty tulǵalar bekitilgen mindetti is-qımyldar tizbegin iske qosady.
Júıeniń basty jańalyǵy — árbir jaǵdaı úshin derbes jaýapkershilikti qamtamasyz etetin keıs-menedjerler ınstıtýtynyń engizilýi. Anyqtalǵan árbir oqıǵa boıynsha arnaıy maman bekitiledi. Ol barlyq qyzmettiń jumysyn úılestirip, balanyń quqyǵy tolyq qalpyna kelgenshe oǵan qoldaý kórsetedi. Mundaı tásil vedomstvolar arasynda jaýapkershiliktiń ıesiz qalýyn boldyrmaıdy jáne zardap shekken balaǵa úzdiksiz kómek berilýin qamtamasyz etedi.
— Qaǵıdada alǵash ret áreket etýdiń naqty merzimderi bekitildi. Máselen, aqparat quzyrly organdarǵa dereý jetkiziledi, 1 saǵat ishinde málimetter bala quqyqtaryn qorǵaý organyna jiberiledi, 1 jumys kúni ishinde keıs-menedjer taǵaıyndalyp, balanyń ómir súrý jaǵdaıy tekseriledi. Al materıaldardy kámeletke tolmaǵandar isteri jónindegi komıssııaǵa tapsyrý úshin 3 jumys kúninen aspaıtyn ýaqyt beriledi, — delingen habarlamada.
Endi resmı ótinishtermen qatar, balalardyń ózderinen túsken belgiler, «111» baılanys ortalyǵynyń málimetteri, sondaı-aq áleýmettik jeliler men BAQ-qa jasalǵan monıtorıng nátıjeleri de áreket etýge negiz bolady. Oqıǵalardy anyqtaý jumysyna barlyq negizgi qurylym, sonyń ishinde mobıldi toptar men psıhologııalyq qoldaý ortalyqtary jumyldyryldy.
Balalarǵa kómek biryńǵaı standart boıynsha kórsetiledi. Oǵan medıtsınalyq, psıhologııalyq, pedagogıkalyq, áleýmettik jáne quqyqtyq qoldaýdyń tolyq paketi kiredi. Taǵy bir mańyzdy ózgeris — budan bylaı memlekettik qorǵaý men mindetti súıemeldeý tek zorlyq-zombylyq kórgen balalarǵa ǵana emes, soǵan kýá bolǵan balalarǵa da beriledi.
Aıta ketelik Oqý-aǵartý mınıstrligi bilim salasy qyzmetkerlerin marapattaý erejesin jańartqan edi.
