Balalarǵa qarjylyq saýattylyqty úıretetin jańa mýltfılm jaryq kórdi

ASTANA. KAZINFORM — Qarjylyq monıtorıngi agenttigi «Zań jáne tártip» normatıvi aıasynda qarjylyq qaýipsizdik taqyryptaryna arnalǵan mýltfılmder tsıklyn iske qosty. 

Búgin Balalardy qorǵaý kúnine oraı, qalyń kórermen arasynda tanymal «Qoshqar men Teke» mýltfılminiń alǵashqy serııasy jaryqqa shyqty.

Alǵashqy serııa qarjy pıramıdalary taqyrybyna arnalady. Balalar súıip kóretin keıipkerler kórermenderge alaıaqtyq shemalardy qalaı anyqtap, ózderin jáne jaqyndaryn qarjylyq aldaýdan qalaı qorǵaýǵa bolatynyn túsindiredi.

— Mýltfılmder tsıkly balalar aýdıtorııasyna baǵyttalǵan jáne ósip kele jatqan urpaqtyń qarjylyq saýattylyǵy men quqyqtyq sanasyn qalyptastyrýdy maqsat etedi. Kelesi bólimderde lýdomanııa, dropperler, ınternet-alaıaqtyq, zańsyz mıkroqarjylyq uıymdardyń qyzmeti sııaqty mańyzdy taqyryptardy qozǵaıdy, — delingen QMA habarlamasynda. 

Aıta ketý kerek, anımatsııalyq týyndy kásibı mýltıplıkatorlardyń qoldaýymen jasaldy. 

Aıta ketelik elde tuńǵysh ret mýltfılmder qazaqsha sýrdoaýdarmamen kórsetiletini týraly jazǵan edik.