Balalarǵa qarjylyq saýattylyqty úıretetin mýltfılm jaryqqa shyǵady
ASTANA. KAZINFORM – «Qarjy álemi» – orman qalashyǵynda ómir súretin mektep oqýshylary týraly 12 bólimnen turatyn mýltserıal
Memleket basshysynyń tapsyrmasyna sáıkes muǵalimder men oqýshylardyń qarjylyq saýattylyǵyn arttyrý baǵytyndaǵy keshendi sharalar jalǵasyp jatyr. Oqý-aǵartý mınıstrliginiń «Órleý» biliktilikti arttyrý ulttyq ortalyǵy men Ulttyq bank birlesip, balalarǵa aqsha basqarýdyń negizgi daǵdylaryn úıretetin anımatsııalyq fılm daıyndady.
«Qarjy álemi» – orman qalashyǵynda ómir súretin mektep oqýshylary týraly 12 bólimnen turatyn mýltserıal. Ár serııada Barys, Arqar, Qulan, Sileýsin, Tıin, Surtyshqan, Kirpi sııaqty keıipkerlerdiń kúndelikti ómirde kezdesetin qarjylyq jaǵdaıattary kórsetiledi. Aqshany durys jumsaý, jınaý, josparlaý, eńbek etý qarapaıym tilde túsindiriledi. Sonymen qatar, alaıaqtardan jáne qarjylyq pıramıdalardan saqtaný daǵdylary keıipkerlerdiń tájirıbesi arqyly berilgen.
Mýltserıal qazaq, orys tilderinde ázirlendi. Stsenarııin qarjy jáne bilim berý salasyndaǵy sarapshylar birlesip jazdy.
Aıta ketelik oqýshylar arasynda alǵash ret qarjylyq saýattylyq pen tsıfrlyq qaýipsizdik olımpıadasy ótetini týraly jazǵan edik.