Balalarǵa ınternet, uıaly telefon arqyly rýhanı azdyratyn ónimderdi kórýge tyıym salynady
ASTANA. 23 sáýir. QazAqparat - Jappaı qoldanystaǵy ınternet, uıaly telefon jelileri arqyly balalardy rýhanı azdyratyn aqparattyq ónimderdiń taralýyna tosqaýyl qoıý joldary qarastyrylady.
Búgin Májilistiń Áleýmettik-mádenı damý komıtetiniń kóshpeli otyrysynda «Balalardy densaýlyǵy men damýyna zardabyn tıgizetin aqparattan qorǵaý týraly» zań jobasynyń tanystyrylymy barysynda depýtat Aldan Smaıyl osylaı málim etti.
«Telekommýnıkatsııalyq jelilerdiń transshekaralyq sıpat alýy balalardy zııandy aqparattardan qorǵaý sharalaryn halyqaralyq aýqymda uıymdastyrýdy qajet etedi. Buǵan oraı zań jobasynda balany zııandy aqparattardan qorǵaý boıynsha halyqaralyq yntymaqtastyqty qamtıtyn taraý engizilip otyr. Onda yntymaqtastyqtyń negizderi, halyqaralyq uıymdarmen yntymaqtastyqty úılestirý jumystarynyń baǵyttary aıqyndalǵan», - dedi A. Smaıyl.
Depýtattyń aıtýynsha, zań jobasy arqyly balalardy zııandy aqparattardan qorǵaý salasyndaǵy memlekettiń prıntsıpteri aıqyndalady. Budan bólek, qujatta zardapty aqparattardyń anyqtamalary berilip, zııandy aqparattyq ónimderdiń aınalymyn toqtatýdyń joldary kórsetiledi. «Teleradıohabarlardyń balalarǵa qolaıly ýaqyttary da zań júzinde belgilenetin bolady. Budan basqa, jappaı qoldanystaǵy ınternet, uıaly telefon jelileri arqyly balalardy rýhanı azdyratyn aqparattyq ónimderdiń taralýyna tosqaýyl qoıý joldary da kózdelgen», - deıdi Aldan Smaıyl.
Onyń aıtýyna qaraǵanda, buǵan deıin elimizde arnaıy zań tetikteriniń bolmaýy respýblıkadaǵy balalar qylmysynyń órshýine, basqa da óreskel qylyqtardyń artýyna ákep soqtyrǵan. Bul rette depýtat qoǵamdaǵy sýıtsıd oqıǵalarynyń jıilep ketkenin de osyndaı quqyqtyq olqylyqtyń bolýymen baılanysatynyn alǵa tartady.
«Qazaqstanda 2009 jyly 202 bala óziniń ómirin qıǵan, 2010 jyly ózine qol salǵan órenderdiń qatary 211-ge jetken. Mine, osy qaterli kórsetkish jyl saıyn qaıtalaný ústinde», - dep túıindedi depýtat A. Smaıyl.
