Balalarǵa ımplant pen breket tegin qoıylady degen ras pa
ASTANA. KAZINFORM — Áleýmettik jelide Almaty, Astana, Shymkent qalalarynda jáne eldiń birqatar óńirinde 18 jasqa deıingi balalarǵa mindetti áleýmettik medıtsınalyq saqtandyrý júıesi arqyly breket pen ımplant ornatý boıynsha pılottyq joba iske qosylǵany týraly aqparat tarady. Alaıda Medıtsınalyq saqtandyrý qorynda bul jalǵan aqparat ekenin málimdedi.
— Balalarǵa ımplanttar men breketterdi mindetti áleýmettik medıtsınalyq saqtandyrý esebinen ornatatyn pılottyq joba» bastalǵany týraly áleýmettik jelilerde taraǵan aqparat shyndyqqa janaspaıdy. MÁMS júıesinde balalarǵa tek jedel jáne josparly túrde birqatar stomatologııalyq qyzmet, sonyń ishinde ortodontııalyq kómek qana qarastyrylǵan. Almaty, Astana, Shymkent qalalarynda jáne birqatar oblysta 18 jasqa deıingi balalarǵa MÁMS aıasynda breketter men ımplanttar ornatý boıynsha pılottyq joba iske qosylǵany týraly habar taraǵan. Alaıda Áleýmettik medıtsınalyq saqtandyrý qorynda qazirgi ýaqytta mundaı joba iske qosylmaǵan, — delingen habarlamada.
MÁMS boıynsha tegin tis emdeý kómegine halyqtyń belgili sanattary qol jetkize alady.
— Atap aıtqanda, balalar jedel jáne josparly stomatologııalyq qyzmetterge júgine alady. Olarǵa kúrdeli tisjegini, pýlpıtti jáne perıodontıtti emdeý, tis túbirin plombalaý, tis julý, abstsessti ashý, plastıkalyq operatsııalar, parodont qaltalaryn sanatsııalaý, sondaı-aq aldyn alý sharalary — fıssýralardy germetızatsııalaý, remıneralızatsııa, mıoterapııa jáne basqa da qyzmetter kiredi. MÁMS júıesi boıynsha sondaı-aq ortodontııalyq kómekti de alýǵa bolady. Ortodontııalyq kómek jaq-bet aýmaǵynyń týa bitken patologııasy bar balalarǵa, tis-jaq anomalııalary bar az qamtylǵan otbasylardan shyqqan balalarǵa kórsetiledi, — dep málimdedi Qordyń baspasóz qyzmeti.
Atalǵan qyzmet tizimine ortodont keńesi, týa bitken jaq-bet patologııasy bar balalar úshin ortodontııalyq plastınkany qoldana otyryp tis-jaq anomalııalaryn túzetý, ortodontııalyq korrektsııa, keshendi bastapqy tekserý, tis qalybyn alý, sút jáne turaqty tisterdi tegisteý, sondaı-aq ortopantomografııa kiredi.
Týa bitti jáne júre paıda bolǵan jaq-bet aımaǵynyń deformatsııalary bar balalarǵa medıtsınalyq kómek stomatolog dárigerdiń kórsetilimderi boıynsha ambýlatorııalyq jaǵdaıda nemese stomatologııalyq jáne jaq-bet hırýrgııasy qyzmetterin kórsetetin medıtsınalyq uıymdarda bet-jaq hırýrg-dárigeri tarapynan kórsetiledi. Barlyq atalǵan qyzmetter MÁMS aıasynda usynylady.
Aıta ketelik búgin zeınetaqy jınaǵynan aqsha alýdy shekteıtin jańa tyıym engizilgen edi.