Balalarǵa beriletin ata-ana qolhaty ózgertilmek

ASTANA. QazAqparat – Elimizde kámelet jasyna tolmaǵan balalar men jasóspirimder alys jolǵa shyqqanda jaýapty adam ata-anasynyń qolhatyn alýy tıis. Onyń zańdyq kúshi bar. Búginde atalǵan mindet qaıta qaralyp, ózgeris engizilgeli jatyr. Bul týraly Ádilet vıtse-mınıstri Bekbolat Moldabekov málim etti, dep habarlaıdy QazAqparat tilshisi.

Ortalyq kommýnıkatsııalar qyzmeti alańynda ótken baspasóz máslıhatynda tilshi «Ózińiz biletindeı, balalar ata-ájesi nemese basqa da jaqyndarymen alys jolda shyqqanda mindetti túrde ata-anasynyń notarıýspen bekitilgen qolhaty talap etiledi. Bul adamnyń qolyn baılaıdy. Osy protsesti tsıfrlandyrý múmkin be?», degen suraq qoıdy.

Saýalǵa Ádilet vıtse-mınıstri Bekbolat Moldabekov pikir bildirdi.

«Ózekti másele shynymen de. Biz bul máseleni qazir qarap jatyrmyz. Basqa memleketterge qalaı sheshilip jatyr degen sııaqty. Kelesi bir kezdesýde siz kótergen máselege qatysty jaqsy bir usynyspen shyǵamyz dep oılaımyn», – dedi mınıstrdiń orynbasary.

Buǵan deıin Bekbolat Moldabekov habarlaǵandaı, sońǵy eki aptada 440 jup mobıldi qosymsha arqyly neke qıdyrǵan.

Onyń aıtýynsha, neke qııýdan basqa da memlekettik qyzmetter boıynsha mobıldi qosymshanyń kómegine júginýge bolady.