Balalarǵa bazarlyq: «Monstrlar demalysy-3» mýltfılmi qazaq tilinde sóıledi
ASTANA. QazAqparat - XIV Halyqaralyq «Eýrazııa» kınofestıvali aıasynda «Monstrlar demalysy - 3» anımatsııalyq fılminiń qazaq tilindegi aldyn-ala kórsetilimi ótti, dep habarlaıdy QazAqparat tilshisi.
«Bolashaq» KQ, BI Group, Marwin jáne Sony Pictures dúkender jelisiniń qoldap uıymdastyrýymen «Monstrlar demalysy - 3» anımatsııalyq fılminiń shym-shytyryqqa toly jalǵasy shyqty jáne kartına keıipkerleri qazaq tilinde sóıledi.
«Álemdik deńgeıdegi stýdııanyń óz týyndylaryn qazaq tilinde taratýǵa quqyq berýi biz úshin mańyzdy, sebebi kórermendi ana tilimizdegi týyndylarmen kóbirek qýantqymyz keledi. Onyń ústine kınematografııa týraly zań jobasy búginde Parlament qaraýynda, atalǵan zańnamada qazaq tilindegi fılmder kontentin kóbeıtý jáne kınoteatrlardyń qazaq tilindegi týyndylarǵa basymdyq berýmen qatar kórermenderge yńǵaıly ýaqytqa qoıý máseleleri qarastyrylǵan. Osy turǵyda biz de óz úlesimizdi qosyp, kishkentaı kórermenderimizdi ana tilimizdegi týyndylarmen qýantýdamyz, alda qazaq tilindegi sapaly týyndylardy daıyndaýda birneshe naqty jobalarymyz bar», - dedi «Bolashaq» korporatıvtik qorynyń atqarýshy dırektory Dınara Chaıjúnisova.
«Monstrlar demalysy - 3» anımatsııalyq fılminiń sıýjeti boıynsha Drakýla óziniń dostarymen birge sándi laınerge minip, krýızge attanady. Kútpegen jerden Drakýla jumbaq ta sulý kapıtan Erıkaǵa ǵashyq bolady, muny sezgen qyzy Mevıs bul sapardyń sumdyqqa aınalatynyn túsinedi, óıtkeni Erıka barlyq monstrlardyń ómirine qaýip tóndiretin qorqynyshty qupııany biletin edi. Monstrlar qupııany ashý jolynda kóptegen shytyrman jaǵdaılarǵa tap bolady jáne anımatsııalyq fılmniń sońy kútpegen oqıǵamen aıaqtalady.
Aldyn ala kórsetilimniń qurmetti qonaqtarynyń biri, Parlament májilisiniń depýtaty Gennadıı Shıpovskıh fılmnen alǵan áserimen bólisti.
«Maǵan mýltfılm unady. Basty nazar aýdaratyny qazaq tilinde shyǵýy jáne áli tusaýy kesilmegen álemdik deńgeıdegi týyndyny qazaqstandyq búldirshinderdiń alǵash bolyp tamashalaýy qýantarlyq dúnıe. Taǵy bir aıta keterligi - aýdarma kezinde til tazalyǵynyń saqtalýy, bylaısha aıtqanda «qazaqı» qalpynda berilgen», - dedi depýtat.
Aıta keteıik, «Monstrlar demalysy - 3» - «Bolashaq» Korporatıvtik qory qazaq tiline dýblıajdaǵan 25-shi fılm. Qazaq tili dýblıajynyń rejısseri jáne mátinniń tóseýshisi - Aıjan Djamshıtova. Dýblıajǵa barlyǵy 30-dan astam akter qatysqan.
«Monstrlar demalysy - 3» fılmin 12 shildeden bastap elimizdiń barlyq kınoteatrlarynda qazaq tilinde tamashalaýǵa bolady.
