Balalarǵa arnalǵan jeke qaýipsizdik sabaqtary jańartyldy
ASTANA. KAZINFORM – Balabaqshalarda, mektepterde jáne kolledjderde jeke qaýipsizdik sabaqtarynyń mazmuny jańartyldy. Baǵdarlamaǵa balalar men jasóspirimder kúndelikti ómirde jáne tsıfrlyq ortada tap bolýy múmkin qaýip-qaterlerge arnalǵan 140-tan astam taqyryp engizildi.
Jańa taqyryptardy Oqý-aǵartý mınıstrligi ıÝNISEF jáne beıindi memlekettik organdarmen birlesip ázirledi. Baǵdarlama jeke jáne tsıfrlyq qaýipsizdik, quqyq buzýshylyqtar men alaıaqtyqtyń aldyn alý, tótenshe jaǵdaılar kezindegi is-qımyl jáne densaýlyqty saqtaý máselelerin qamtıdy.
Sabaq mazmuny balalardyń jas ereksheligine qaraı beıimdelgen. Mektepke deıingi jastaǵy balalar beıtanys adamdarmen qaýipsiz qarym-qatynas jasaýǵa, kómek suraýǵa jáne adasyp qalǵan jaǵdaıda qalaı áreket etý kerektigine úırenedi. Bastaýysh synyptarda jeke shekara, ınternettegi qaýipsizdik, kúmándi siltemeler, órt jáne evakýatsııa kezindegi áreketter qarastyrylady.
Jasóspirimder úshin býllıng pen kıberbýllıng, ınternet-alaıaqtyq, derbes derekterdi qorǵaý, jalǵan aqparat, dıpfeıkter jáne jasandy ıntellektini qaýipsiz paıdalaný taqyryptary engizilgen. Sonymen qatar qysym kórsetý, bopsalaý, qorqytý, aqsha talap etý jáne qýdalaý jaǵdaılary talqylanady.
Joǵary synyp oqýshylary men kolledj stýdentteri dropperlik pen «ońaı aqsha» shemalaryn, qarjylyq jáne eńbek alaıaqtyǵyn, qaýipti onlaın-tanystyqtardy, grýmıng pen stalkıngti, manıpýlıatsııa men arbaýdy, sondaı-aq quqyqqa qaıshy áreketterge tartylý táýekelderin qarastyrady.
Oqý-aǵartý mınıstrligi málimetinshe, sabaqtar apta saıyn synyp nemese kýratorlyq saǵat aıasynda 10 mınýttan ótkiziledi. Negizgi basymdyq praktıkalyq daǵdylarǵa berilgen: balalar naqty ómirlik jaǵdaılardy taldap, qaýipti aldyn ala tanýǵa, ózin qorǵaýǵa jáne kómek qajet bolǵanda kimge júginý kerektigin bilýge úırenedi.
Mektepterde 2-4-synyp oqýshylarynyń aralyq baǵalaýy ótetinin jazǵan edik.
