Balalarǵa arnalǵan zamanaýı kıim úlgisi baǵasynyń qol jetimdiligi, yńǵaılylyǵy men jaılylyǵy talqylandy
ASTANA. Tamyzdyń 19-y. QazAqparat - Búgin «On-laın» rejiminde «Mektep formasy jáne Qazaqstan pedagogtarynyń qazirgi zamanǵy kıim úlgisi» degen taqyrypta respýblıkalyq semınar-keńes ótti, dep habarlaıdy Qazaqstan Respýblıkasynyń Bilim jáne ǵylym mınıstrliginiń baspasóz qyzmeti.
Oǵan oblystyq, Astana jáne Almaty qalalarynyń bilim basqarmalarynyń, qalalyq, aýdandyq bilim bólimderiniń basshylary, balalar kıimderin shyǵaratyn óndirýshiler, pedagogıkalyq jáne ata-analar qaýymdary qatysty.
Interaktıvti forým barysynda oqýshylarǵa arnalǵan mektep formasynyń, sporttyq kıimderdiń, jalpy bilim beretin mektepterdegi pedagog qyzmetkerlerge arnalǵan isker kıim úlgileri kórsetildi.
Keńeske qatysýshylar balalarǵa arnalǵan zamanaýı kıim úlgisiniń baǵasynyń qol jetimdiligin, yńǵaılylyǵyn men jaılylyǵyn talqylady. Ata-analar men mektep qaýymynyń, kıim úlgilerin tigýshilerdiń pikirleri tyńdaldy, Aqtóbe, Atyraý, Jambyl, Batys Qazaqstan, Qostanaı, Pavlodar oblystarynyń jáne Almaty qalasynyń mektep formasyn engizý jónindegi tájirıbeleri tanystyryldy.
Pedagogtar men oqýshylardyń ishki mádenıetine ǵana emes, olardyń syrtqy túrine de basa nazar aýdarylady. Óıtkeni, bilim berý protsesinde usaq-túıek joq, onyń barlyq qatysýshylary úshin qolaıly orta qalyptastyrý mańyzdy.
Respýblıkalyq semınar-keńeske eldiń ár óńirinen barlyǵy 700-den astam bilim berý uıymdarynyń ókilderi qatysty.
