Balalarǵa arnalǵan uıymdardy tekserý jıiligi bekitildi

ASTANA.KAZINFORM — Balalarǵa qyzmet kórsetetin bıýdjetten qarjylandyrylatyn uıymdar josparly túrde tekseriledi, dep habarlaıdy Sanıtarııalyq-epıdemıologııalyq baqylaý komıtetiniń baspasóz qyzmeti.

Balalarǵa arnalǵan qyzmetter kórsetetin jáne memlekettik bıýdjetten qarjylandyrylatyn uıymdar úshin jańa josparly tekserý qaǵıdalary engiziledi. Bul uıymdar erekshe baqylaý men qadaǵalaýǵa alynady.

Jańa talaptarǵa sáıkes, tekserý jıiligi táýekel deńgeıine baılanysty bolady:

• joǵary táýekel tobyna jatatyn mekemeler keminde jarty jylda bir ret tekseriledi;

• tómen táýekel tobyna kiretin uıymdar jylyna bir retten jıi emes tekseriledi.

Mundaı uıymdardyń jartyjyldyq tekserý tizimderi Komıtettiń aýmaqtyq bólimsheleriniń resmı ınternet-resýrstarynda jarııalanyp otyrady.

— Bul sharalar baqylaý protsesiniń ashyqtyǵyn arttyrýǵa, zań buzýshylyqtardy der kezinde anyqtaýǵa, sondaı-aq balalar men jalpy halyqtyń densaýlyǵyna tónetin qaýipterdiń aldyn alýǵa baǵyttalǵan, — dep túsindirdi vedomstvo.

Aıta keteıik, balalarǵa qyzmet kórsetetin uıymdarǵa baqylaý men qadaǵalaýdyń erekshe tártibi engizildi. 2025 jylǵy 4 jeltoqsanda Memleket basshysy memlekettik bıýdjet qarajaty esebinen qarjylandyrylatyn jáne balalarǵa tamaqtaný, turý, medıtsınalyq kómek kórsetý, bilim berý, tárbıeleý jáne saýyqtyrý qyzmetterin kórsetetin uıymdar men obektilerge qatysty memlekettik baqylaý men qadaǵalaýdyń erekshe tártibin engizýdi kózdeıtin Zańǵa qol qoıdy. Zań 2026 jylǵy 1 aqpannan bastap kúshine enedi.