Balalarǵa arnalǵan senim telefonyna kimder habarlasady
ASTANA. QazAqparat - «Daǵdarys ortalyqtary odaǵy» ZTB basqarma tóraıymy Zúlfııa Baısaqova «Balalar men jastarǵa arnalǵan ulttyq biryńǵaı senim telefony» iske qosylǵaly beri qansha jáne qandaı qońyraýlar kelip jatqany týrasynda aıtty, dep habarlaıdy «QazAqparat» HAA tilshisi.
Odaq basshysynyń aıtýynsha, «150» nómirine balalar men jastardan bólek, eresekter de qońyraý shalatyn kórinedi.
«Bir qyzyǵy, bizge habarlasatyndardyń 60 paıyzy balalar emes, eresekter bolyp otyr. Olardyń qataryna atalar men ájelerdi, kórshilerdi, balalarmen tikeleı jumys júrgizetin mamandardy qosýǵa bolady», - deıdi Zúlshfııa Baısaqova.
Kóp jaǵdaıda senim telefonyniń nómirin názik jandylar teretin kórinedi.
«Bizge kóp jaǵdaıda qyzdarynyń kúndelikti ómiri men qajettiligi týrasynda áıelder keńes suraý úshin habarlasady. Názik jandylardyń erlerden góri ýaıymshyl keletini belgili. Búkil qońyraýlardyń 30 protsenti túngi ýaqytta túsedi», - deıdi odaq tóraıymy.
Onyń aıtýynsha, ulttyq biryńǵaı jeliniń basty qaǵıdaty - kez kelgen habarlasýshynyń málimetin qupııa túrde saqtaý bolyp tabylady.
«Biz úshin ár balanyń óz atyn atamaı, aqyl-keńes suraý asa mańyzdy. Qupııalylyqty basty erejemizge aınaldyrǵanymyzdyń sebebi de sonda», - deıdi ol.
Aıta keteıik, Jastar men balalarǵa arnalǵan ulttyq biryńǵaı jeli (150) 2005 jylǵy 20 qarashada iske qosylǵan. Senim telefony táýlik boıy jumys atqarady. 12 jyldyń ishinde oǵan 1,5 mln qońyraý kelip túsken. Onyń 43 myńy balalar men jastardyń quqyǵynyń buzylýyna qatysty tirkelip otyr.
