Balalarǵa arnalǵan «Keleshek» biryńǵaı erikti jınaqtaý júıesi engiziledi
«Bárine birdeı bilim berý úshin ınternet jyldamdyǵy joǵary jáne bilim berýdiń tsıfrly resýrstary tegin ári qoljetimdi bolýy shart. Bilim berý júıesi eńbek naryǵynyń suranysyna qaraı ózgerip otyrýy kerek. Ulttyq ekonomıkanyń birqatar salasynda kadr tapshylyǵy qatty seziledi. Ásirese, tehnıkalyq jáne jumysshy mamandar jetispeıdi. Sondyqtan, osy salalarǵa qatysty bilim berýmen myqtap aınalysqan jón», - dedi Qasym-Jomart Toqaev.
Memleket basshysynyń aıtýynsha, oqý oryndary túlekterge jumys bere alatyn mekemelermen uzaq merzimge arnalǵan áriptestik ornatýy qajet. Ekonomıkanyń basymdyqtaryna, aımaqtyń jáne salanyń erekshelikterine baılanysty tıimdi qarjylandyrý tásilderi kerek. Elimizdegi demografııalyq ósim bilimge degen suranysty arttyrady.
«Memlekettiń bilim salasyna qatysty jumysynda tutastyq, ıaǵnı júıe joq. Tipti, ózara baılanys joq deýge bolady. Sondyqtan, bes jastan asqan balalarǵa arnalǵan «Keleshek» atty biryńǵaı erikti jınaqtaý júıesin engizýdi tapsyramyn. Bul baǵdarlamada memleket tarapynan usynylatyn bastapqy bilim berý kapıtaly, jyl saıynǵy memlekettik syıaqy jáne ınvestıtsııalyq tabys qarastyrylýǵa tıis. Osy jınaq pen «Ulttyq qor – balalarǵa» jobasynyń qarajaty qosylǵanda jas urpaqtyń sapaly bilim alýyna múmkindik týady», - dedi Prezıdent.
Qasym-Jomart Toqaev qazir eńbek naryǵynda aýqymdy ózgerister bolyp jatqanyn eske saldy.
«Onda tsıfrly ekonomıkanyń róli arta túspek. Platformalyq jumyspen qamtý júıesine qyzyǵýshylyq artyp keledi. Osy sektorda qazirdiń ózinde jarty mıllıonnan astam adam jumys isteıdi. Alaıda olardyń eńbek quqyqtary tolyq qorǵalmaǵan. Sondyqtan, osy sanattaǵy azamattardyń eńbek quqyqtaryn qorǵaýdyń naqty tásilderin ázirlep, platformalyq jumyspen qamtý máselesin túgel retteý qajet», - dedi Prezıdent.
